Прысутнасць

Пане, дапамажы мне быць па-сапраўднаму жывым для Тваёй Святой прысутнасці. Ахіні мяне любоўю. Няхай маё сэрца будзе злучана з Тваім.

Свабода

Пане, дапамажы мне адпусціць неспакой, крыўды і страхі,
якія часам так неадчэпна ходзяць за мной.
Дазволь мне адкрыць рукі і сэрца, каб свабодна прыняць
усе дары, неабходныя мне ў гэты час.

Усведамленне

Дзе ў сваім жыцці я адчуваю надзею, заахвочванне і бачу перспектывы росту? Прыгадваючы мінулыя некалькі месяцаў, ці не адчуваю я, якая дзейнасць і якія падзеі прыносілі багаты плён? Калі так, то прымаю рашэнне прысвячаць ім больш часу у будучыні.

Божае слова

¹³Ніхто не ўзышоў на неба, акрамя таго, хто з неба сышоў, — Сын Чалавечы. ¹⁴Як Майсей узняў змея ў пустыні, так павінен быць узняты Сын Чалавечы, ¹⁵каб кожны, хто верыць у Яго, меў жыццё вечнае».

¹⁶Бо так палюбіў Бог свет, што аддаў Сына свайго Адзінароднага, каб кожны, хто верыць у Яго, не загінуў, але меў жыццё вечнае.

¹⁷Бо не паслаў Бог Сына свайго ў свет, каб судзіць свет, але каб свет быў збаўлены праз Яго.

Разважанне да Божага слова

Бог, Стварыцель усяго, любіць усё, што стварыў, і хоча, каб мы ўсе былі збаўлены. Пасля таго, як мы парушылі Божы план нашага шчасця, Тройца пачала здзяйсняць новы план, які павінен быў выратаваць нас праз жыццё, смерць і ўваскрасенне Езуса Хрыста. Калі Бог даў нам свайго ўмілаванага Сына, то Ён ніколі не адмовіў бы нам у чымсьці, што патрэбна для шчасця. Звярнемся да Яго ў малітве з вялікім даверам і ўдзячнасцю.

Размова

Паразважаю, як я сёння слухаў Божае слова. Што я хацеў бы ўзяць з сабой? Што хачу запомніць з сённяшняга чытання?

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн