Прысутнасць

“Ты дарогу жыцця мне пакажаш, паўната радасці перад Табою, вечнае шчасце праваруч Цябе” (Пс 16 (15), 11). Пане, дапамажы мне жыць у Тваёй прысутнасці.

Свабода

Пане, ахвярую Табе – як святы Ігнацый – сваю памяць, розум,
усю сваю волю. Усё, чаго я прашу ў адказ, гэта Тваёй любові і Тваёй ласкі – і мне хопіць.

Усведамленне

Ведаючы, што Бог любіць мяне безумоўна,
Я магу дазволіць сабе быць шчырым.
Як прайшоў мінулы дзень і што я адчуваю зараз?
Распавядаю пра свае пачуцці Пану.

Божае слова

³¹А Ён працягваў: «З кім параўнаю людзей гэтага пакалення? Да каго яны падобныя? ³²Яны падобныя да дзяцей, што сядзяць на рынку і аклікаюць адны другіх, кажучы:

“Мы гралі вам на жалейцы, а вы не танцавалі, мы спявалі журботныя песні, а вы не плакалі!”

³³Прыйшоў Ян Хрысціцель, які не еў хлеба і не піў віна, а вы кажаце: “У ім злы дух!” ³⁴Прыйшоў Сын Чалавечы, які есць і п’е, а вы кажаце: “Гэты чалавек абжора і п’яніца, прыяцель мытнікаў і грэшнікаў!” ³⁵І была апраўдана мудрасць усімі дзецьмі сваімі».

Разважанне да Божага слова

Жыхарам Юдэіі і Галілеі выпала незвычайная магчымасць: Бог хадзіў сярод іх і чыніў вялікія цуды. Стагоддзямі людзі прагнулі ўбачыць тое, што бачылі яны, пачуць тое, што чулі яны. Але ў жорсткасці сваіх сэрцаў іх лідэры заплюшчылі вочы. Няма большага сляпога, чым той, хто не хоча бачыць.

«Або Ён дэман, або п'яніца». Як лёгка мы знаходзім апраўданні для сваёй сваволі, апраўданні таму, што не адпавядаем хрысціянскаму пакліканню. Молімся: «Пане, каб я мог бачыць».

Размова

Якое слова ці выраз з сённяшняга Евангелля прыцягнулі маю ўвагу? Прашу Пана адкрыць мне, што Ён хоча сказаць мне гэтым словам…

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн