Прысутнасць

Чым часцей мы клічам Бога, тым лепш адчуваем Яго прысутнасць. Дзень за днём мы набліжаемся да Божага Сэрца, напоўненага Любоўю.

Свабода

Дзякуй за дар свабоды, Пане.
Дай мне магчымасць верна ісці за Табою.
Дапамажы заўсёды памятаць пра шляхі Твае,
а таксама пра Тваю любоў і апеку над усім светам.

Усведамленне

Мы ўсе пілігрымы ў дарозе да Цябе, Пане.
Дай нам сузіраць Цябе на зямлі
і з Тваёй дапамогай ісці па Тваіх слядах.

Божае слова

⁵Апосталы сказалі Пану: «Дадай нам веры!» ⁶А Пан сказаў: «Калі б вы мелі веру з гарчычнае зерне, вы маглі б сказаць гэтай смакоўніцы: “Вырвіся з карэннем і перасадзіся ў мора”, і яна б паслухалася вас.

⁷Хто з вас, маючы слугу, які арэ або пасвіць, скажа яму, калі ён вернецца з поля: “Як прыйдзеш, адразу сядай за стол?” ⁸Наадварот, ці не скажа яму: “Прыгатуй мне павячэраць і, падперазаўшыся, прыслужвай мне, пакуль буду есці і піць, а пасля будзеш есці і піць ты?” ⁹Ці будзе ён дзякаваць слугу гэтаму за тое, што ён выканаў загаданае? ¹⁰Таксама вы, калі выканаеце ўсё загаданае вам, кажыце: “Мы нікчэмныя слугі, бо зрабілі тое, што павінны былі зрабіць”.

Разважанне да Божага слова

Марыя, Маці Божая, сказала: «Вось, я слуга Пана. Няхай мне станецца паводле твайго слова». Мы ўсе слугі Бога, які не мае патрэбы ў нас для свайго шчасця. Гэта мы, у праўдзе нашага існавання, маем патрэбу ў тым, каб праслаўляць Яго. Святы Ігнацый Лаёла пісаў у «Пачатку і аснове» сваіх «Духоўных практыкаванняў»: «Чалавек створаны, каб хваліць Бога, нашага Пана, шанаваць Яго і служыць Яму, і праз гэта збавіць сваю душу». Так рабіць правільна і слушна, бо мы ўсім абавязаны Богу. «Пане, каб мы бачылі».

Размова

Ці заўважаю, як рэагую на малітву Словам Божым?
Ці адчуваю занепакоенасць, суцяшэнне, гнеў?
Уяўляючы Езуса, які сядзіць ці стаіць побач са мной,
выказваю свае пачуцці, як добраму сябру.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн