Прысутнасць

Чым часцей мы клічам Бога, тым лепш адчуваем Яго прысутнасць. Дзень за днём мы набліжаемся да Божага Сэрца, напоўненага Любоўю.

Свабода

Пане, Ты стварыў мяне для жыцця ў свабодзе. Няхай Твой Святы Дух вядзе мяне вольна крочыць за Табой. Укарані ў маім сэрцы жаданне пазнаваць і любіць Цябе з кожным днём усё больш.

Усведамленне

Падумаю, як сябе адчуваю.
Ці стомлены мацней, чым звычайна, напружаны або знерваваны?
Калі штосьці падобнае адбываецца,
паспрабую на час малітвы выпусціць з увагі клопаты, якія мяне турбуюць.

Божае слова

¹Калі Ён маліўся ў пэўным месцы і калі перастаў, адзін з вучняў Ягоных сказаў Яму: «Пане, навучы нас маліцца, як і Ян навучыў сваіх вучняў». ²Ён сказаў ім: «Калі моліцеся, кажыце:

“Ойча, няхай свяціцца імя Тваё, няхай прыйдзе Валадарства Тваё.

³Хлеба нашага штодзённага давай нам кожны дзень, ⁴і адпусці нам грахі нашыя, бо і мы адпускаем кожнаму даўжніку нашаму, і не ўводзь нас у спакусу”».^,

Разважанне да Божага слова

Часцей за іншых евангелістаў святы Лука піша пра Езуса ў малітве. Нам варта прасіць Бога навучыць нас узрастаць у малітве. Дом Джон Чэпмен OSB казаў, што мы павінны маліцца так, як можам, а не так, як не можам. Мы вучымся на практыцы, і чым часцей, тым лепш.

У малітве «Ойча наш» Езус вучыць нас правільнаму стаўленню: Бог –найперш і вышэй за ўсё; у сэрцы неабходна мець прабачэнне для іншых; у сваіх просьбах трэба маліцца не толькі за сябе, але і за ўсіх людзей.

Размова

Сябры не хаваюць адзін ад аднаго сакрэтаў.
Калі я малюся, ці магу паглядзець на Езуса як на свайго сябра
і падзяліцца з Ім сваім патаемным,
з верай, што Ён мяне разумее?

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн