Прысутнасць

“Бог — наша прыстанішча і сіла, надзейная дапамога ў нядолі” (Пс 46, 2). Пане, словы псальма вядуць нас да спакою і велічы Тваёй прысутнасці.

Свабода

Бог не чужы маёй свабодзе.
Наадварот, Дух удыхае жыццё ў самыя ўтоеныя жаданні,
далікатна падштурхоўвае мяне да ўсялякага дабра.
Прашу аб ласцы, каб дазволіць Духу агарнуць мяне.

Усведамленне

Калі я размаўляю з Табою, Божа,
дапамажы мне ўзрастаць ва ўдзячнасці за дар камунікацыі.
Учыні так, каб я гаварыў за тых, хто не мае голасу
і заўсёды меў добрае слова для людзей у патрэбе.

Божае слова

⁵І сказаў ім: «Хтосьці з вас, маючы сябра, пойдзе да яго апоўначы і скажа яму: “Дружа, пазыч мне тры хлябы, ⁶бо сябар мой з дарогі зайшоў да мяне, і я не маю чаго даць яму”. ⁷А той знутры скажа яму ў адказ: “Не турбуй мяне, дзверы ўжо замкнёныя, і дзеці мае ў ложку са мною. Не магу ўстаць і даць табе”. ⁸Кажу вам: калі ён не ўстане і не дасць яму праз тое, што той сябра ягоны, то праз настойлівасць ягоную ўстане і дасць яму, колькі патрабуе.

⁹І Я вам кажу: прасіце, і будзе дадзена вам; шукайце, і знойдзеце; стукайце, і адчыняць вам. ¹⁰Бо кожны, хто просіць, атрымлівае; і хто шукае, знаходзіць; і хто стукае, таму будзе адчынена. ¹¹Калі ў кагосьці з вас, бацькі, сын папросіць рыбы, ці той дасць яму замест рыбы змяю? ¹²Або, калі папросіць яйка, дасць яму скарпіёна? ¹³Калі ж вы, будучы дрэннымі, умееце даваць добрыя дары дзецям вашым, тым больш Айцец Нябесны дасць Духа Святога тым, хто просіць у Яго».

Разважанне да Божага слова

Кожная малітва пачута Богам, і той, хто настойліва шукае Яго, знойдзе Яго. Бог жадае, каб мы знайшлі Яго, таму гэта не павінна быць занадта цяжка для тых, хто мае веру. Пан ведае, што нам патрэбны гэты дар, і Ён ніколі не адмовіць тым, хто яго просіць. Таму, як пісала сястра Вэндзі Бэкет: «Проста папрасі, а потым ідзі і жыві гэтым». Мы молімся аб ласцы настойлівасці і большага даверу.

Размова

Часам я задаюся пытаннем, што б я сказаў, калі б сустрэўся з Табой асабіста, Пане.
Магчыма, так: “Дзякую, Божа, што Ты заўсёды са мной”.
Я дакладна ведаю, што былі часы, калі Ты нёс мяне, Пане,
калі дзякуючы Тваёй сіле я перажыў цёмныя перыяды жыцця.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн