Прысутнасць

Божа, Ты бліжэй, чым я магу паверыць, бліжэй, чым маё дыханне. Твая блізкасць – благаслаўленне, і мне не трэба баяцца.

Свабода

Пане, дай мне спазнаць,
што выкананне Тваёй волі прыносіць радасць,
бо Твая воля – маё найглыбейшае жаданне,
і Ты заўсёды прагнеш лепшага для мяне.

Усведамленне

Нябесны Ойча, дазволь мне ўзрастаць у цноце, слухаючы Цябе і прабываючы з Табой. Няхай Твая дабрыня перапаўняе маё жыццё і пераліваецца з майго жыцця ў жыццё ўсіх тых, каго я сустракаю.

Божае слова

¹⁵А некаторыя з іх казалі: «Бэльзэбулам, князем злых духаў, Ён выганяе злых духаў». ¹⁶Іншыя, выпрабоўваючы, патрабавалі ад Яго знаку з неба. ¹⁷Але Ён, ведаючы іх думкі, сказаў ім: «Усялякае валадарства, якое падзялілася само ў сабе, спусташаецца, і дом на дом падае. ¹⁸Калі сатана ў сабе падзяліўся, як выстаіць валадарства яго? Вы кажаце, што Я сілаю Бэльзэбула выганяю злых духаў. ¹⁹Калі Я сілаю Бэльзэбула выганяю злых духаў, то сыны вашыя сілаю каго выганяюць іх? Таму яны будуць вашымі суддзямі. ²⁰Калі Я пальцам Божым выганяю злых духаў, то прыйшло да вас Божае Валадарства. ²¹Калі ўзброены асілак пільнуе свой дзядзінец, у бяспецы маёнтак ягоны. ²²А калі нападзе мацнейшы за яго і пераможа яго, то возьме ўсю зброю яго, на якую той спадзяваўся, і раздасць здабычу сваю. ²³Хто не са Мной, той супраць Мяне, і хто не збірае са Мной, той раскідае.

²⁴Калі нячысты дух выйдзе з чалавека, ён блукае па бязводных мясцінах, шукаючы адпачынку, і, не знайшоўшы, кажа: “Вярнуся да дому свайго, адкуль выйшаў”. ²⁵І, прыйшоўшы, знаходзіць яго вымеценым і прыбраным. ²⁶Тады ідзе і бярэ іншых сем духаў, злейшых за сябе, і яны, увайшоўшы, жывуць там. І бывае апошняе для чалавека таго горшым за першае».

Разважанне да Божага слова

Сатана, злы дух, пастаянна шукае сабе спрыяльнае месца пражывання. Езус заклікае быць напагатове і распазнаваць хітрыкі зламысніка. У Брэвіярыі чытаем: «Не давайце д'яблу магчымасці». Св. Ігнацый раіць нам зачыняць дзверы пры першых прыкметах спакус. Памолімся аб духу распазнавання.

Прыгадаем сабе, што сатана бяссільны супраць тых, хто імкнецца падтрымліваць сапраўднае малітоўнае жыццё. Езус сказаў, што ніхто не можа ўкрасці або вырваць з рукі Айца тых, каго Айцец даў Яму (Ян 10:29).

Размова

Якія ласкі хоча ўдзяліць мне Бог ў гэтай малітве? Услухаюся, у цішыні сэрца, што Пан кажа мне…

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн