Прысутнасць

Раблю паўзу перад тым, як увайсці ў малітву,
і думаю пра любоў і шматлікія ласкі,
якімі Бог абсыпае мяне,
ствараючы мяне паводле вобраза і падабенства Свайго,
будуючы мяне як Сваю святыню…

Свабода

Пане, Ты стварыў мяне для жыцця ў свабодзе. Няхай Твой Святы Дух вядзе мяне вольна крочыць за Табой. Укарані ў маім сэрцы жаданне пазнаваць і любіць Цябе з кожным днём усё больш.

Усведамленне

Нябесны Ойча, дзякуй Табе, што Твая любоў ніколі не мінае і што Твая міласэрнасць аднаўляецца з пачаткам кожнага новага дня. Няхай жа я заўсёды звяртаюся да Цябе са сваімі патрэбамі, з любоўю і даверам.

Божае слова

¹⁵Адзін з тых, хто сядзеў разам з Езусам, сказаў Яму: «Шчаслівы, хто будзе есці хлеб ў Валадарстве Божым». ¹⁶А Ён сказаў яму: «Адзін чалавек наладжваў вялікую вячэру і паклікаў многіх. ¹⁷Калі настаў час вячэры, паслаў слугу свайго сказаць запрошаным: “Прыйдзіце, бо ўжо ўсё гатова”. ¹⁸І пачалі ўсе, як адзін, адгаворвацца. Першы сказаў яму: “Я купіў поле, і мне трэба пайсці паглядзець яго. Прашу цябе, прабач мне”. ¹⁹Другі сказаў: “Я купіў пяць пар валоў і іду выпрабаваць іх. Прашу цябе, прабач мне”. ²⁰Іншы сказаў: “Я ажаніўся, і таму не магу прыйсці”. ²¹Вярнуўшыся, слуга расказаў пра гэта свайму гаспадару. Тады гаспадар дома разгневаўся і сказаў слугу свайму: “Ідзі хутчэй на вуліцы і завулкі горада і прывядзі сюды ўбогіх, калек, сляпых і кульгавых”. ²²І сказаў слуга: “Пане, зроблена, як загадаў ты, і яшчэ ёсць месца”. ²³Гаспадар сказаў слугу: “Ідзі да дарог і загарадзяў і прымушай прыйсці, каб напоўніўся мой дом. ²⁴Бо кажу вам, што ніхто з тых запрошаных людзей не пакаштуе маёй вячэры”».

Разважанне да Божага слова

Сённяшгяе Евангелле – гэта запрашэнне. Мы ўсе пакліканы да святасці жыцця, гэта значыць да ўдзелу ў банкеце на нябёсах. Вось мэта нашага існавання на зямлі. Як пісаў паэт Пэдзі Кавана: «Тыя, хто не паляцеў дамоў да Бога, не паляцелі зусім».

Тут крыецца выклік для кожнага хрысціяніна: незалежна ад жыццёвага паклікання, мы павінны вырашыць: прыняць ці адхіліць Божае запрашэнне да сапраўдных, жывых адносін. Мы можам апраўдвацца, як людзі ў сённяшнім Евангеллі, што ў нас ёсць гаспадаркі, якімі трэба кіраваць, бізнес, які трэба весці, і сем'і, якія трэба выхоўваць, але ў рэшце рэшт мы мусім прыняць рашэнне, а потым жыць паводле гэтага рашэння. Папа Францішак пісаў: «Я не веру ў святасць без малітвы».

Размова

Божае Слова заўсёды плённае.
Ці гэта актуальна для мяне цяпер,
калі гляджу на тое, як прайшла малітва?
Ці адчуваю суцяшэнне?
Ці былі нейкія цяжкасці і выклікі?

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн