Прысутнасць

Стаю ў Тваёй прысутнасці, Божа.
Няхай заўсёды ў мяне будзе час, каб бачыць і смакаваць
прыгажосць, якую Ты стварыў
дзеля майго захаплення.

Свабода

Буду прасіць Божай дапамогі, каб
быць свабодным ад прадузятасці,
быць адкрытым на Бога падчас малітвы, і
больш пазнаваць, любіць і служыць Яму.

Усведамленне

У гэты момант, Пане, я скіроўваю думкі да Цябе.
Я пакіну ў баку свае справы і клопаты.
Адпачну і аднаўлю сілы ў Тваёй прысутнасці.

Божае слова

²⁵Шмат людзей ішло за Езусам. Абярнуўшыся, Ён сказаў ім: ²⁶«Калі хто прыходзіць да Мяне і не зненавідзеў бацькі свайго, маці і жонкі, дзяцей і братоў, сясцёр і нават жыцця свайго, той не можа быць Маім вучнем. ²⁷Хто не нясе крыжа свайго, а ідзе за Мною, не можа быць Маім вучнем. ²⁸Бо хто з вас, калі захоча пабудаваць вежу, спачатку не сядзе і не падлічыць выдаткаў, ці мае на завяршэнне будовы. ²⁹Калі ж закладзе падмурак і не зможа закончыць, усе, хто ўбачыць, пачнуць смяяцца з яго, ³⁰кажучы: “Гэты чалавек пачаў будаваць і не змог скончыць”. ³¹Або які кароль, ідучы на вайну супраць іншага караля, не сядзе і не параіцца спачатку, ці моцны ён, каб ісці з дзесяццю тысячамі супраць таго, хто ідзе на яго з дваццаццю тысячамі? ³²Калі не, то пакуль той яшчэ далёка, ён пашле да яго пасланцоў прасіць міру. ³³Таму кожны з вас, калі не пакіне ўсяго, што мае, не можа быць Маім вучнем.

Разважанне да Божага слова

На першы погляд, сённяшні фрагмент Евангелля можа здацца вельмі жорсткім, але падобныя ўрыўкі нельга ўспрымаць асобна ад астатняга Пісання і, вядома ж, не літаральна. Езус вучыў любіць іншых людзей, а не ненавідзець. Ужыванне перабольшвання, каб мацней падкрэсліць думку, было часткай габрэйскай педагогікі. Бог і Валадарства заўсёды маюць першынства, таму прывязанасць да матэрыяльных рэчаў можа стаць перашкодай паміж намі і Богам. Будзем прасіць аб тым, каб мы ўмелі правільна ацэньваць рэчаіснасць і не прывязваліся да таго, што часовае.

Размова

Пане, дапамажы мне злучыцца з Табою. Я не заўсёды ведаю, як, але хачу атрымаць Тваю любоў і адкрываю далоні і сэрца. Калі ласка, прыдзі да мяне сёння.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн