Прысутнасць

У любы час дня і ночы мы можам паклікаць Езуса.
Ён заўсёды чакае нашага запрашэння.
Якое ж гэта благаслаўленне!
Не патрэбныя тэлефоны і электронныя паведамленні, толькі шэпт.

Свабода

«Вельмі мала людзей,
якія разумеюць, што з імі зрабіў бы Бог,
калі б яны аддаліся ў Ягоныя рукі,
і дазволілі Ягонай ласцы сфармаваць сябе» (Святы Ігнацый).
Прашу аб ласцы цалкам даверыцца Божай любові.

Усведамленне

Езу, дзякую Табе за гэты момант, калі я адчуваю Тваю прысутнасць. Дапамажы мне ўзрастаць ва ўважнасці на Тваю прысутнасць у штодзённым жыцці і ў іншых людзях.

Божае слова

¹³Набліжалася юдэйская Пасха, і Езус увайшоў у Ерузалем. ¹⁴У святыні знайшоў тых, хто гандляваў валамі, авечкамі і галубамі, а таксама мянялаў, якія сядзелі там. ¹⁵Ён зрабіў біч з вяровак, павыганяў усіх са святыні, і авечак, і валоў, і грошы мянялаў парассыпаў, а сталы перавярнуў. ¹⁶А гандлярам галубамі сказаў: «Забярыце гэта адсюль! Не рабіце дом Айца Майго домам гандлю». ¹⁷І прыгадалі вучні Ягоныя, што напісана: «Руплівасць аб доме Тваім паглынае Мяне». ¹⁸На гэта юдэі сказалі Яму ў адказ: «Якім знакам пакажаш нам, што так можаш рабіць?» ¹⁹Езус сказаў ім у адказ: «Зруйнуйце святыню гэтую, і Я за тры дні ўзвяду яе». ²⁰Юдэі сказалі: «Сорак шэсць гадоў будавалася гэтая святыня, а Ты за тры дні ўзвядзеш яе?» ²¹Ён жа казаў пра святыню свайго цела. ²²І калі Ён уваскрос, успомнілі вучні Ягоныя, што Ён гэта казаў, і паверылі Пісанню і слову, якое казаў Езус.

Разважанне да Божага слова

Можна вылучыць два віды гневу. Адзін — апраўданы гнеў з-за несправядлівасці, якую мы бачым у дачыненні да людзей. Другі — гэта помслівы гнеў, які імкнецца пакараць тых, хто нас пакрыўдзіў, і можа прывесці да таго, што не здолеем любіць усіх паводле запаведзі любові. Памолімся аб ласцы духоўнага распазнавання.

Звярніце ўвагу, што ў гэтым урыўку Езус выкарыстоўвае бізун з вяровак, каб выгнаць прадаўцоў жывёл і мянялаў, і ў той жа час Ён проста звяртаецца да менш заможных прадаўцоў галубоў і кажа прыбраць адтуль свой гандаль.

Размова

Няхай Твой Святы Дух вядзе мяне
ва ўсіх кантактах з людзьмі.
Няхай дасць мне здольнасць з любоўю размаўляць з усімі.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн