Прысутнасць

Затрымаюся на момант,
разважаючы пра жыццядайную прысутнасць Бога
ува мне і ва ўсім вакол мяне,
і ва ўсім маім жыцці.

Свабода

З Божай ласкі я нарадзіўся/нарадзілася, каб жыць у свабодзе,
атрымліваць асалоду ад дабротаў, якія Ён стварыў для мяне.
О Пане, дай мне жыць паводле Тваёй задумы,
напоўніцу давяраючы Тваёй любові.

Усведамленне

Нам усім трэба на нейкі час аддаляцца ад штодзённых клопатаў.
Мы ведаем, што нашае цела патрабуе адпачынку.
Калі мы прыходзім у прысутнасць Тваю, Пане,
то аднаўляем сэрца, розум і дух.

Божае слова

²³Калі Ён прыйшоў у святыню і навучаў, падышлі да Яго першасвятары і старэйшыны народу і сказалі: «Якою ўладаю Ты гэта робіш? І хто даў Табе гэтую ўладу?» ²⁴Езус адказаў ім: «Спытаю ў вас і Я пра адно; калі скажаце Мне пра гэта, тады і Я вам скажу, якою ўладаю раблю гэта. ²⁵Адкуль быў Янаў хрост? З неба ці ад людзей?» Яны ж разважалі паміж сабою, кажучы: «Калі скажам: “З неба”, то Ён скажа нам: “Чаму ж вы не паверылі яму?” ²⁶А калі скажам: “Ад людзей”, – баімся натоўпу, бо ўсе лічаць Яна прарокам». ²⁷І сказалі ў адказ Езусу: «Не ведаем». Тады і Ён сказаў ім: «І Я не скажу вам, якой уладай раблю гэта».

Разважанне да Божага слова

Магчыма, тут варта сказаць некалькі слоў пра «аўтарытэт». Гэтае слова паходзіць ад лацінскага auctoritas, якое само па сабе з'яўляецца абстрактным назоўнікам ад дзеяслова augere. Augere азначае «павялічваць, рабіць большым». Той жа дзеяслоў мы знаходзім і ў слове «аўтар». Чалавек з «аўтарытэтам» не той, хто можа прымусіць. Праяўленне сапраўднага аўтарытэту заключаецца не ў кантролі або падпарадкаванні. Наадварот, гэта той, хто вызваляе патэнцыял у людзях, дае магчымасці развіцця. Езус не меў улады прымусу. Ён запрашаў людзей ісці за Ім. Ён прыйшоў служыць, а не каб Яму служылі. Ён прыйшоў, каб весці людзей да поўнага развіцця таго, чым яны могуць быць і павінны быць.

Ён зрабіў гэта выразна, калі стаў на калені і абмыў ногі вучням. Гэта быў акт улады – улады праяўлення любові. Кожны сам вырашае, ці ісці шляхам любові, ці ісці нейкім сваім шляхам. Кожны з нас мог бы паразважаць у малітве над тым, як мы ажыццяўляем уладу ў сваім жыцці: як бацькі, настаўнікі, працадаўцы ці ў любой іншай якасці, дзе мы нясём нейкую адказнасць перад іншымі. Вельмі мала хто з нас зусім не мае ўлады.

Размова

Пане, дапамажы мне злучыцца з Табою. Я не заўсёды ведаю, як, але хачу атрымаць Тваю любоў і адкрываю далоні і сэрца. Калі ласка, прыдзі да мяне сёння.

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн