Прысутнасць

Кожны момант напоўнены хвалебнай прысутнасцю Бога. Калі я ўсё больш і больш аддаюся цеснай еднасці з Тым, хто стварыў мяне, адкрываю, што ў мяне проста няма часу турбавацца.

Свабода

Пане, Ты стварыў мяне жыць у свабодзе.
У асноўным я ўспрымаю гэты дар як належнае.
Натхні мяне жыць у свабодзе, якую Ты задумаў для мяне,
са спакойным сэрцам і поўным даверам да Цябе.

Усведамленне

Калі я тут з Табой, Пане,
я ўсведамляю, колькі благаслаўленняў Ты мне даеш.
Думаю пра любоў і ласкі ў маім жыцці,
і адчуваю ўдзячнасць.

Божае слова

¹⁸Нараджэнне Езуса Хрыста было такім. Пасля заручын Маці Ягонай Марыі з Юзафам, перш чым яны пачалі жыць разам, Яна зачала ад Духа Святога. ¹⁹Юзаф жа, муж Яе, будучы справядлівым і не жадаючы зняславіць Яе, хацеў патаемна адпусціць Яе. ²⁰Калі ён надумаў гэта, вось анёл Пана з’явіўся яму ў сне і сказаў: «Юзэфе, сыне Давіда, не бойся прыняць Марыю, жонку тваю, бо зачатае ў Ёй ёсць ад Духа Святога. ²¹Яна ж народзіць Сына, а ты дасі Яму імя Езус, бо Ён збавіць народ свой ад грахоў ягоных». ²²А ўсё гэта сталася, каб збылося сказанае Панам праз прарока, які кажа:

²³«Вось Дзева зачне і народзіць Сына, і дадуць Яму імя Эммануэль,

што азначае “з намі Бог”».

²⁴Абудзіўшыся ад сну, Юзаф зрабіў, як загадаў яму анёл Пана, і прыняў жонку сваю.

Разважанне да Божага слова

Юзаф быў справядлівым. Паслухмяны закону Майсея, ён хацеў бы разарваць саюз з Марыяй, якая, як на тое выглядала, так сур'ёзна парушыла закон. І ўсё ж, паколькі Юзаф быў такім добрым чалавекам, ён не хацеў падвяргаць яе жудаснаму пакаранню, бо людзі яе маглі ўкаменаваць. У гэтым, для яго часу (ды і для нашага), ён выяўляе незвычайную цярплівасць. Мала хто быў бы падобны да Юзафа і дзейнічаў у такой ​​сітуацыі з такім спакоем і стрыманасцю. Менавіта тады адбываецца боскае ўмяшанне, і Юзаф запэўнены, што ні пра якога іншага мужчыну не ідзецца, Марыя зачала сілай Божага Духа. Юзафу даручана назваць нованароджанае дзіця Езусам «Ягвэ ратуе»: Ён выратуе свой народ ад грахоў. Бог усё яшчэ жыве са сваім народам - праз Цела Уваскрослага Езуса, Касцёл, нашыя супольнасці па ўсім свеце. Кожны з нас пакліканы быць Эмануэлем, "Богам з намі". Праз нас людзі могуць сустрэцца з Богам і пачуць пасланне любові і збаўлення, прабачэння і прымірэння.

Размова

Якія ласкі хоча ўдзяліць мне Бог ў гэтай малітве? Услухаюся, у цішыні сэрца, што Пан кажа мне…

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн