Прысутнасць

Калі я прыходжу да Цябе, Пане,
Я ведаю, што знаходжуся ў прысутнасці майго Стварыцеля.
Ты стварыў мяне з любові.
Ты ведаеш нават, колькі валасоў у мяне на галаве.
Твая прысутнасць, о Пане, – найвялікшы дар.

Свабода

Стараюся адмовіцца ад любых забабонаў і абмежаванасці мыслення,
якія могуць затуманіць мой зрок у гэты момант.
Аддаю ўсё міласэрнаму клопату Бога, каб маліцца ў свабодзе, праўдзе і яснасці.

Усведамленне

У прысутнасці майго любячага Стварыцеля я шчыра гляджу на свае пачуцці за апошні дзень: уздымы, спады і спакойны стан. Ці бачу, дзе быў Пан?

Божае слова

¹Калі Езус нарадзіўся ў Бэтлееме Юдэйскім у дні караля Ірада, прыбылі ў Ерузалем мудрацы з усходу, ²кажучы: «Дзе народжаны Кароль юдэйскі? Мы бачылі зорку Ягоную на ўсходзе і прыйшлі пакланіцца Яму». ³Пачуўшы гэта, кароль Ірад занепакоіўся, і ўвесь Ерузалем з ім. ⁴Ён сабраў усіх першасвятароў і кніжнікаў народу і пытаўся ў іх, дзе мае нарадзіцца Хрыстус. ⁵Яны сказалі яму: «У Бэтлееме Юдэйскім, бо так напісана прарокам:

⁶“І ты, Бэтлеем, зямля Юды, нічым не меншы сярод гарадоў Юды, бо з цябе выйдзе Правадыр, які будзе пасвіць народ Мой, Ізраэля”».

⁷Тады Ірад, патаемна паклікаўшы мудрацоў, выведаў у іх пра час з’яўлення зоркі. ⁸Паслаўшы іх у Бэтлеем, сказаў: «Ідзіце і дакладна разведайце пра Дзіця; калі знойдзеце, паведаміце мне, каб і я пайшоў пакланіцца Яму». ⁹Яны ж, выслухаўшы караля, пайшлі. А зорка, якую бачылі на ўсходзе, ішла перад імі, пакуль, прыйшоўшы, не спынілася над месцам, дзе было Дзіця. ¹⁰Убачыўшы зорку, яны вельмі ўзрадаваліся. ¹¹Калі ўвайшлі ў дом, убачылі Дзіця з Марыяй, Маці Яго. Упаўшы, пакланіліся Яму і, адчыніўшы скарбніцы свае, ахвяравалі Яму дары: золата, кадзіла і міра. ¹²Атрымаўшы ў сне наказ не вяртацца да Ірада, адышлі ў сваю краіну іншай дарогай.

Разважанне да Божага слова

У вершы, прысвечаным падарожжу мудрацоў, Т. С. Эліёт прапануе ўявіць сабе мудрацоў з Усходу, якія заўважаюць на небе штосьці незразумелае. Іх мудрасць і цікаўнасць дапамагалі ім інтэрпрэтаваць падзеі вакол сябе на зямлі, і, дзякуючы гэтым здольнасцям, яны былі гатовыя прыкласці нямала намаганняў, каб паспрабаваць высветліць, што можа азначаць дзіўная зорка, якую яны ўбачылі. Няўжо яна сведчыць аб тым, што ў Ізраэлі нарадзіўся новы кароль? Мудрацы не ведалі, куды прывядзе іх зорка. Яны проста ішлі, пакуль яна не прывяла іх у Бэтлеем да Езуса. І ніколі не пашкадавалі аб сваім рашэнні. Калі ў нас толькі хопіць смеласці і даверу рушыць па іх прыкладзе, наўрад ці мы таксама будзем шкадаваць. Калі мы яшчэ гэтага не зрабілі, сёння – самы час распачаць шлях.

Размова

Няхай Твой Святы Дух вядзе мяне
ва ўсіх кантактах з людзьмі.
Няхай дасць мне здольнасць з любоўю размаўляць з усімі.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн