Прысутнасць

Бог ёсць Эммануэль, Бог-са-мной. Ягоная прысутнасць ахінае мяне прамяністай любоўю. Ён дакладна ведае, што мне патрэбна ў кожны момант. Я ўскладаю ўвесь свой давер на Яго.

Свабода

«Тоўстае і бясформеннае бервяно
ніколі не паверыла б, што можа стаць статуяй,
якой будуць захапляцца як цудам скульптуры,
і ніколі не скарылася б разцу скульптара,
які дзякуючы свайму генію бачыць, што з яго можна зрабіць» (Святы Ігнацый).
Прашу аб ласцы, каб дазволіць любячаму Стварыцелю фармаваць мяне.

Усведамленне

Пане, Ты прысутны ва ўсім
і калі я знаходжу час, каб проста пасядзець і пабыць з Табой,
мой розум адпачывае
і я адчуваю Твой супакой.

Божае слова

⁴⁵I адразу загадаў вучням сваім увайсці ў човен і плысці ўперад Яго на другі бераг да Бэтсаіды, пакуль Ён адпусціць людзей. ⁴⁶Развітаўшыся з імі, Ён пайшоў на гару памаліцца.

⁴⁷Калі настаў вечар, човен быў на сярэдзіне мора, а Ён адзін на беразе. ⁴⁸Убачыўшы іх знясіленых ад веславання, бо ім дзьмуў сустрэчны вецер, каля чацвёртай варты ночы Ён прыйшоў да іх, ідучы па моры, і хацеў прайсці міма. ⁴⁹Калі ж яны ўбачылі, як Ён ідзе па моры, падумалі, што гэта прывід, таму закрычалі. ⁵⁰Бо ўсе, убачыўшы Яго, спалохаліся. Але Ён адразу загаварыў з імі і сказаў ім: «Будзьце адважнымі, гэта Я; не бойцеся!» ⁵¹І ўвайшоў да іх у човен, а вецер сціх. Яны вельмі здзіўляліся, ⁵²бо не разумелі цуду з хлебам, таму што сэрца іхняе было скамянелае.

Разважанне да Божага слова

Цалкам відавочна, Пане, што клопат пра вучняў не пакідаў Тваіх думак. Калі Ты ўбачыў, што яны зноў апынуліся ў цяжкай сітуацыі, Ты адразу пачаў дзейнічаць. Прашу Цябе: калі я апынуся ў складаным становішчы і буду вельмі спалоханы, – як вучні ў сённяшнім чытанні, – прыйдзі мне на дапамогу з тымі ж словамі: «Будзь адважным, гэта Я, не бойся».

Размова

Якія пачуцці ўзнікаюць ва мне, калі я малюся і разважаю над Божым Словам?
Я ўяўляю самога Езуса, які сядзіць ці стаіць каля мяне, і адкрываю Яму сваё сэрца.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн