Прысутнасць

Пане, пакуль я тут,
напоўні маё сэрца і ўсю маю істоту
цудам Тваёй прысутнасці.

Свабода

Пане, навучы мяне шанаваць дар свабоды.
Ты даў мне вялікае благаслаўленне свабоды духу.
Напоўні мой дух Тваім супакоем і Тваёй радасцю.

Усведамленне

У прысутнасці майго любячага Стварыцеля я шчыра гляджу на свае пачуцці за апошні дзень: уздымы, спады і спакойны стан. Ці бачу, дзе быў Пан?

Божае слова

¹⁴Езус вярнуўся ў моцы Духа ў Галілею. І разышліся чуткі пра Яго па ўсёй ваколіцы. ¹⁵А Ён навучаў у іх сінагогах, і ўсе Яго славілі.

¹⁶Калі прыйшоў у Назарэт, дзе быў выхаваны, увайшоў паводле свайго звычаю ў шабат у сінагогу і падняўся, каб чытаць. ¹⁷Яму падалі кнігу прарока Ісаі. Разгарнуўшы кнігу, Ён трапіў на месца, дзе было напісана:

¹⁸«Дух Пана на Мне, бо Ён намасціў Мяне абвяшчаць Добрую Навіну ўбогім, паслаў Мяне абвяшчаць вызваленне палонным і сляпым вяртаць зрок, каб выпусціць спакутаваных на свабоду, ¹⁹каб абвясціць год ласкі Пана».

²⁰Згарнуўшы кнігу, Ён аддаў яе слугу і сеў. А вочы ўсіх у сінагозе былі скіраваныя на Яго. ²¹І Ён пачаў гаварыць ім: «Сёння споўніліся гэтыя словы Пісання, якія вы чулі». ²²Усе сведчылі Яму і здзіўляліся словам ласкі, якія выходзілі з вуснаў Ягоных, і казалі: «Ці ж не сын Юзафа гэта?»

Разважанне да Божага слова

Словы Ісаі, якія чытае Езус, трэба ўспрымаць як літаральна, так і ў больш шырокім сэнсе. Гэта пасланне да бедных, зняволеных, сляпых і прыгнечаных. Але гэтыя акрэсленні можна разумець у больш поўным значэнні. Акрамя матэрыяльнай, існуе інтэлектуальная, эмацыйная і сацыяльная беднасць. Ёсць шмат рэчаў, якія знявольваюць людзей, у тым ліку розныя формы залежнасцяў. Слепата бывае не толькі фізічная, але і з прычыны невуцтва, забабонаў і адсутнасці праўдзівага бачання свету. Людзі могуць адчуваць сябе прыгнечанымі сіламі, якія дамінуюць у іх жыцці, напрыклад, апантанасцю матэрыялістычнымі каштоўнасцямі і спажывецтвам, або амбіцыямі за кошт іншых. Кожнаму з нас трэба зазірнуць у сваё жыццё і ўбачыць, дзе нам найбольш патрэбна вызваленне. Словы Езуса можна разглядаць як «місію». На ёй будзе грунтавацца ўсё Ягонае жыццё. І гэта маніфест таго жыцця, да якога пакліканы ісці кожны чалавек.

Размова

Езус часта задаваў пытанні тым, хто прыходзіў да Яго.
Адчуваючы Яго цяпер побач,
уяўлю, што Ён пытаецца ў адказ на маю малітву:
“Чаго ты жадаеш?”
“Як табе дапамагчы?”
“Што Я магу табе даць?”

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн