Прысутнасць

“Бог — наша прыстанішча і сіла, надзейная дапамога ў нядолі” (Пс 46, 2). Пане, словы псальма вядуць нас да спакою і велічы Тваёй прысутнасці.

Свабода

Вядзі мяне заўсёды выконваць Тваю святую волю,
ведаючы, што Твая магутнасць
дапаможа ва ўсім.

Усведамленне

Як я пачуваюся сёння?
Ці побач з Богам ці далёка ад Яго? Як мае адносіны з іншымі?
Ці ёсць за што быць удзячным? Дзякую…
Ці ёсць за што шкадаваць? Прашу прабачэння…

Божае слова

²²А кніжнікі, якія прыйшлі з Ерузалема, казалі, што Ён мае ў сабе Бэльзэбула і князем злых духаў Ён выганяе злых духаў. ²³А Езус, паклікаўшы іх, казаў ім у прыпавесцях: «Як можа сатана выганяць сатану? ²⁴Калі валадарства падзеліцца знутры, не можа выстаяць такое валадарства. ²⁵І калі дом падзеліцца знутры, не можа выстаяць такі дом. ²⁶І калі сатана паўстаў супраць сябе і падзяліўся, не можа выстаяць, але канец яму. ²⁷Ніхто не можа ўвайсці ў дом асілка і выкрасці ягоныя рэчы, калі спачатку не звяжа асілка. Тады толькі абрабуе дом ягоны.

²⁸Сапраўды кажу вам, што сынам чалавечым будуць адпушчаны ўсе грахі і блюзнерствы, якімі б ні блюзнерылі. ²⁹Але той, хто будзе блюзнерыць супраць Духа Святога, ніколі не атрымае адпушчэння, а будзе асуджаны навекі». ³⁰Так сказаў, бо гаварылі: «Ён мае нячыстага духа».

Разважанне да Божага слова

Часам сустракаеш людзей, якія, здаецца, ніколі не бачаць дабра ў дзеяннях іншых. Тут кніжнікі з гатоўнасцю прыпісваюць найгоршыя матывы ўчынкам, якія Езус робіць для іншых. Гэта вузкі і абмежаваны погляд на чалавечую прыроду, які цалкам супярэчыць евангельскаму сцвярджэнню, што Божая дабрыня бязмежная. Гледзячы на сябе, спытаю, ці заўсёды я падыходжу да спраў з пазітыўным стаўленнем, калі бачу ўчынкі іншых? Айцец Пэдра Арупэ SJ прасіў Хрыста ў малітве: "Навучы мяне Твайму спосабу абыходжання з вучнямі, рыбакамі, дзецьмі, фарысеямі, Пілатам і Ірадам. ... Гэта праўда, што Ты быў строгі да людзей з дрэннымі намерамі. Праўда, аднак, і тое, што Твая дабрыня прыцягвала людзей настолькі, што яны забываліся пра ежу. Хворыя былі перакананыя, што Ты злітуешся над імі. Твой досвед звычайнага жыцця дазваляў Табе прамаўляць у прыпавесцях перад натоўпамі простых людзей. ... Твая непарыўная сувязь з Айцом у малітве, якая пачыналася перад світаннем і доўжылася аж да позняй ночы, была суцяшэннем і сілай для абвяшчэння Валадарства".

Размова

Зараз я ўяўляю перад сабой адну з Асобаў Тройцы, Айца, Сына ці Святога Духа, хто прыйдзе ва ўяўленне найбольш натуральным чынам, і вяду сардэчную размову аб сённяшнім фрагменце Пісання або падзях майго жыцця, якія хвалююць мяне ў гэты момант.

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн