Прысутнасць

Раблю паўзу перад тым, як увайсці ў малітву,
і думаю пра любоў і шматлікія ласкі,
якімі Бог абсыпае мяне,
ствараючы мяне паводле вобраза і падабенства Свайго,
будуючы мяне як Сваю святыню…

Свабода

Часцей за ўсё мне перашкаджае дасягнуць свабоды мая схільнасць
патанаць у страхах і чаканнях
аб тым, якой асобай я “маю быць”.
Мае звыклыя спосабы рэагавання звязваюць мяне
і перашкаджаюць бачыць новыя абшары ўзрастання.
Я прашу і малюся аб большым адчуванні ўнутранай свабоды і
таго, што Бог жадае здзейсніць ва мне.

Усведамленне

Усведамляць штосьці – значыць памятаць, прымаць пад увагу. Божа, дапамажы мне памятаць, што Ты даў мне жыццё. Дзякую Табе за дар жыцця. Навучы мяне запавольвацца, шукаць цішыню і атрымліваць асалоду ад створаных для мяне дабротаў, заўважаць прыгажосць вакол сябе: цуд гор, спакой азёр, крохкасць пялёсткаў. Мне трэба памятаць, што ўсё гэта паходзіць ад Цябе.

Божае слова

³¹Тады прыйшлі Маці Яго і браты Ягоныя і, стоячы звонку, паслалі паклікаць Яго. ³²Натоўп, які сядзеў каля Яго, казаў Яму: «Вось Маці Твая, і браты Твае, і сёстры Твае на вуліцы шукаюць Цябе». ³³Але Ён сказаў ім у адказ: «Хто маці Мая і браты Мае?» ³⁴І, паглядзеўшы на тых, хто сядзеў вакол Яго, сказаў: «Вось маці Мая і браты Мае. ³⁵Бо хто будзе выконваць волю Божую, той Мне брат, і сястра, і маці».

Разважанне да Божага слова

Варта адзначыць, што пра сям'ю Езуса двойчы сказана, што яны звонку, на вуліцы. Яны, можна сказаць, "аўтсайдэры". Такім чынам, тыя, яікя сядзяць вакол Езуса, знаходзяцца "ўнутры", яны "інсайдэры", свае. Езус выразна кажа, што быць "унутры" не з'яўляецца пытаннем толькі месцазнаходжання, але адносін. Адносіны гэтыя не па крыві, а па прыналежнасці да Хрыста. Быць хрысціянінам значыць увайсці ў новую сям'ю з больш моцнымі сувязямі, чым па крыві, і дзе кожны стае братам ці сястрой. Родным будзе кожны, "хто выконвае волю Божую". Трэба прызнаць, што гэтая сям'я можа ўключаць і тых, хто не з'яўляецца хрысціянінам. Марыя знаходзіцца "ўнутры" не таму, што Яна была Маці Езуса, а таму, што ад пачатку была "слугой Пана", цалкам ідэнтыфікавала сябе з Яго місіяй і была з Ім да самага канца. Няхай жа і мы зможам сказаць тое ж самае.

Размова

Маўкліва сяджу з маім Богам, які ведае кожную маю думку, кожную патрэбу і кожнае жаданне, і дазваляю Яму служыць мне ў гэты момант. Я атрымліваю неабходны для далейшай дарогі пасілак.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн