Прысутнасць

Хвілінку паразважаю над прысутнасцю Бога вакол мяне і ўва мне.
Стварыцель сусвету, сонца і месяца, зямлі,
кожнай малекулы, кожнага атама, усяго, што ёсць:
Бог у кожным удары сэрца. Бог са мной – цяпер.

Свабода

Стараюся адмовіцца ад любых забабонаў і абмежаванасці мыслення,
якія могуць затуманіць мой зрок у гэты момант.
Аддаю ўсё міласэрнаму клопату Бога, каб маліцца ў свабодзе, праўдзе і яснасці.

Усведамленне

Мяне ахінае Твая любячая прысутнасць, Пане,
але я ўсведамляю сваю ўразлівасць і слабасць.
Дзякуй, што магу сутыкнуцца са сваімі недахопамі
у Тваіх міласэрных абдымках.

Божае слова

²¹І казаў ім: «Ці для таго прыносяць светач, каб паставіць яго пад пасудзіну або пад ложак? Ці ўсё ж для таго, каб паставіць яго на свечніку? ²²Бо няма нічога схаванага, што б ні адкрылася, і няма нічога таемнага, што б ні выявілася. ²³Хто мае вушы, каб слухаць, няхай слухае». ²⁴І сказаў ім: «Зважайце на тое, што чуеце. Якой мераю мераеце, такой і вам будзе адмерана, і яшчэ дададзена будзе вам. ²⁵Бо хто мае, таму дадзена будзе, а хто не мае, у таго адымецца і тое, што мае».

Разважанне да Божага слова

Наша хрысціянская вера – гэта святло для свету, і яе нельга хаваць, трымаць у сакрэце, а трэба распаўсюджваць. Колькі людзей ведае, што мы хрысціяне? Колькі людзей бачаць, як мы практыкуем сваю веру? На каго мы паўплывалі прыкладам свайго жыцця паводле хрысціянскага бачання? Наша вера, нашы веды пра Езуса і Яго Евангелле – гэта не толькі штосьці асабістае, але дар для ўсіх. "Добры" католік не проста выконвае ўсе запаведзі, часта ходзіць на Імшу і застаецца ў стане ласкі, хутчэй "добрыя" католікі — гэта тыя, хто выпраменьвае сваю веру, шчодра дзеліцца ёю і вельмі хоча, каб іншыя мелі такі ж досвед любові Бога, як і яны. Калі нас не ўспрымаюць як хрысціян, мы прамахнуліся, якім бы добрым ні было наша ўнутранае жыццё. Мала быць добрым чалавекам, трэба таксама быць апосталам, евангелізатарам, дзяліцца верай праз слова і ўчынак.

Размова

Якія пачуцці ўзнікаюць ва мне, калі я малюся і разважаю над Божым Словам?
Я ўяўляю самога Езуса, які сядзіць ці стаіць каля мяне, і адкрываю Яму сваё сэрца.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн