Прысутнасць

Раблю паўзу перад тым, як увайсці ў малітву,
і думаю пра любоў і шматлікія ласкі,
якімі Бог абсыпае мяне,
ствараючы мяне паводле вобраза і падабенства Свайго,
будуючы мяне як Сваю святыню…

Свабода

«У тыя дні Бог вучыў мяне,
як школьны настаўнік вучня» (св. Ігнацый).
Я нагадваю сабе, што ёсць рэчы, якім Бог яшчэ не навучыў мяне,
і прашу адарыць ласкай, каб пачуць іх і дазволіць змяніць мяне.

Усведамленне

О, Пане, дазволь мне свядома і ўдзячна
прыняць усе ласкі, якія Ты спасылаеш мне.
Няхай мне заўсёды хапае велікадушнасці, каб дзяліцца сваімі благаслаўленнямі з іншымі.

Божае слова

¹⁴Вучні Езуса забыліся ўзяць хлеба і мелі з сабой у чоўне толькі адзін бохан хлеба. ¹⁵Тады Езус загадаў ім: «Глядзіце, асцерагайцеся закваскі фарысейскай і закваскі Ірада!» ¹⁶А яны разважалі між сабою, што не маюць хлеба. ¹⁷Пазнаўшы гэта, Езус сказаў ім: «Чаму разважаеце, што не маеце хлеба? Хіба не разумееце і не ведаеце? Ці яшчэ скамянелыя сэрцы вашы? ¹⁸Маеце вочы і не бачыце, маеце вушы і не чуеце? Ці не памятаеце, колькі поўных кашоў рэштак вы сабралі, ¹⁹калі Я разламаў пяць хлябоў на пяць тысяч?» Яны адказалі Яму: «Дванаццаць». ²⁰«А калі Я разламаў сем хлябоў на чатыры тысячы, колькі поўных кашоў рэштак сабралі вы?» Яны адказалі: «Сем». ²¹Тады сказаў ім: «Усё яшчэ не разумееце?»

Разважанне да Божага слова

Пакуль яны плывуць у чаўне, Езус проста хоча пабыць з вучнямі, пагаварыць. Аднак тыя ахоплены хваляваннем, што ім не хапае ежы. Яны не чуюць Пана. Успомні падобную сітуацыю, калі цябе паглыналі думкі пра недахоп грошай, праблемы са здароўем ці на працы... Езус прыгадвае вучням гісторыю пра размнажэнне хлеба, каб яны заўважылі, чаго могуць дасягнуць разам з Настаўнікам. Сваімі пытаннямі Ён заахвочвае іх самастойна зрабіць высновы. Паспрабуй прааналізаваць сваю складаную сітуацыю ў гэтым святле і абмяркуй яе з Езусам.

Размова

Пане, Ты выразаў маё імя
на Сваіх далонях.
Нават калі іншыя мяне забываюць,
Ты не забудзеш ніколі.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн