Прысутнасць

Няхай сэрца маё радуецца Тваёй любоўю, Пане.
Дазволь мне пражываць кожны дзень як новы.

Свабода

Нябесны Ойча, дай мне ўсвядоміць увесь цяжар, ​​які цяпер нясу, і Сваёй ласкай дапамажы пакласці яго ля падножжа Хрыстовага Крыжа і свабодна ўвайсці ў гэты час малітвы.

Усведамленне

Як я сябе адчуваю? У добрым настроі? Або прыгнечаным?
Магчыма, мне цяпер добра быць тут.
Аднак, можа быць і так, што ўваходжу ў гэты час малітвы расчараваным, заклапочаным або нават раззлаваным.
Прызнаю перад Панам, што са мной дзеецца на самой справе. Вось такога, сапраўднага, мяне любіць Пан.

Божае слова

²⁸Адзін кніжнік, які прыслухоўваўся да іх, як яны размаўлялі паміж сабою, падышоў і спытаўся: «Якая запаведзь першая з усіх?» ²⁹Езус адказаў: «Першая такая: “Слухай, Ізраэль, Пан Бог наш — Пан адзіны; ³⁰любі Пана Бога твайго ўсім сэрцам тваім, і ўсёй душой тваёй, і ўсім розумам тваім, і ўсёй моцаю тваёй”. ³¹ Другая: “Любі бліжняга твайго, як самога сябе”. Няма іншай запаведзі, большай за гэтыя». ³²І сказаў Яму кніжнік: «Добра, Настаўнік, Ты праўду сказаў, што ёсць адзін і няма іншага, апроч Яго. ³³Любіць Яго ўсім сэрцам, і ўсім розумам, і ўсёю моцаю; і любіць бліжняга, як самога сябе — гэта больш за ўсе ахвяры і ўсеспаленні». ³⁴Езус, убачыўшы, што той разумна адказвае, сказаў яму: «Недалёка ты ад Валадарства Божага». І ніхто ўжо больш не адважваўся пытацца ў Яго.

Разважанне да Божага слова

Любоў да сябе – гэта падмурак, на якім можам будаваць іншыя адносіны. Любіць сябе – значыць прыняць сябе з усімі сваімі моцнымі і слабымі бакамі, з радасцямі і смуткамі, з жаданнем Бога і са сваёй грахоўнасцю. Ці падабаешся ты сабе? Ці можаш любіць сябе такім, які ты сёння ёсць? Любіць бліжняга няпроста. Любоў выяўляецца ў канкрэтных учынках адносна тых, хто адказвае ўзаемнасцю, але і тых, каму ўсё роўна, і хто настроены варожа. Бог – крыніца любові. Ён першым палюбіў цябе і прымае такімі, які ты ёсць: безумоўна і цалкам. Менавіта ў Ім і з Ім ты можаш любіць сваіх бліжніх штодня. У Божым валадарстве пануе любоў. Напрыканцы малітвы папрасі Езуса навучыць цябе шчодрай і бескарыслівай любові да Бога, бліжніх і сябе.

Размова

Зараз я ўяўляю перад сабой адну з Асобаў Тройцы, Айца, Сына ці Святога Духа, хто прыйдзе ва ўяўленне найбольш натуральным чынам, і вяду сардэчную размову аб сённяшнім фрагменце Пісання або падзях майго жыцця, якія хвалююць мяне ў гэты момант.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн