Прысутнасць

Хай радуецца і весяліцца сэрца маё
у гэты час малітвы.
Нагадвай мне часцей пра вялікія
благаслаўленні, якія Ты даеш мне, Божа мой.

Свабода

Пане, Ты стварыў мяне для жыцця ў свабодзе. Няхай Твой Святы Дух вядзе мяне вольна крочыць за Табой. Укарані ў маім сэрцы жаданне пазнаваць і любіць Цябе з кожным днём усё больш.

Усведамленне

Дапамажы мне, Пане, лепш усведамляць Тваю прысутнасць.
Навучы мяне распазнаваць Тваю прысутнасць у іншых.
А сэрца напоўні ўдзячнасцю за выпадкі, калі Ты дзейнічаў праз іншых людзей, выяўляючы нязмерную любоў і клопат.

Божае слова

⁹Расказаў таксама прыпавесць і некаторым упэўненым у сваёй праведнасці, якія пагарджалі іншымі: ¹⁰«Два чалавекі зайшлі ў святыню памаліцца: адзін фарысей, а другі мытнік. ¹¹Фарысей, стаўшы, маліўся сам сабе так: “Божа, дзякую Табе, што я не такі, як іншыя людзі, рабаўнікі, несправядлівыя, распуснікі або як гэты мытнік. ¹²Пашчу два разы на тыдзень, даю дзесяціну з усяго, што набываю”. ¹³А мытнік, стоячы воддаль, не адважваўся нават падняць вачэй да неба, але, б’ючы сябе ў грудзі, казаў: “Божа, будзь міласцівы да мяне, грэшнага”. ¹⁴Кажу вам, што менавіта гэты пайшоў да дому свайго апраўданы, а не той, бо кожны, хто ўзвышае сябе, прыніжаны будзе, а хто прыніжае сябе, будзе ўзвышаны».

Разважанне да Божага слова

Двое пайшлі ў святыню памаліцца. Адзін вярнуўся без нічога насамрэч, а другі вярнуўся ў свой дом з удзячнасцю ў сэрцы. Калі яны атрымалі такія розныя вынікі ад малітвы, то варта задумацца, чым адрозніваліся іх падыходы? Як гэтая прыпавесць можа змяніць тваё стаўленне да малітвы, тваю паставу перад Богам, тваю інтэнцыю?

Размова

Сябры не хаваюць адзін ад аднаго сакрэтаў.
Калі я малюся, ці магу паглядзець на Езуса як на свайго сябра
і падзяліцца з Ім сваім патаемным,
з верай, што Ён мяне разумее?

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн