Прысутнасць

“Ты дарогу жыцця мне пакажаш, паўната радасці перад Табою, вечнае шчасце праваруч Цябе” (Пс 16 (15), 11). Пане, дапамажы мне жыць у Тваёй прысутнасці.

Свабода

“Я свабодны чалавек”.
Калі гляджу цяпер на гэтыя словы,
яны нібы выклікаюць ува мне пачуццё трымцення.
Так, пачуццё свабоды цудоўнае.
Дзякую Табе, Божа.

Усведамленне

Усведамляць штосьці – значыць памятаць, прымаць пад увагу. Божа, дапамажы мне памятаць, што Ты даў мне жыццё. Дзякую Табе за дар жыцця. Навучы мяне запавольвацца, шукаць цішыню і атрымліваць асалоду ад створаных для мяне дабротаў, заўважаць прыгажосць вакол сябе: цуд гор, спакой азёр, крохкасць пялёсткаў. Мне трэба памятаць, што ўсё гэта паходзіць ад Цябе.

Божае слова

⁴³Праз два дні Езус выйшаў адтуль і пайшоў у Галілею. ⁴⁴Бо сам Езус сведчыў, што прарок не мае пашаны на сваёй бацькаўшчыне. ⁴⁵Калі ж прыйшлі ў Галілею, то галілейцы прынялі Яго, убачыўшы ўсё, што Ён зрабіў у Ерузалеме на свята, бо і яны хадзілі на свята.

⁴⁶Так Езус зноў прыйшоў у Кану Галілейскую, дзе перамяніў ваду ў віно. І быў адзін прыдворны, у якога хварэў сын у Кафарнауме. ⁴⁷Пачуўшы, што Езус прыбывае з Юдэі ў Галілею, ён пайшоў да Яго і прасіў прыйсці і вылечыць ягонага сына, які паміраў. ⁴⁸Езус жа сказаў яму: «Калі не ўбачыце знакаў і цудаў, не паверыце». ⁴⁹Прыдворны кажа Яму: «Пане, прыйдзі, пакуль не памерла дзіця маё». ⁵⁰Езус адказаў яму: «Ідзі, сын твой жывы». Чалавек паверыў слову, якое сказаў яму Езус, і пайшоў. ⁵¹Калі быў яшчэ ў дарозе, слугі ягоныя сустрэлі яго і сказалі, што сын ягоны жыве. ⁵²52 Тады распытваў іх, у якую гадзіну яму палепшала? Яму сказалі: «Учора а сёмай гадзіне гарачка пакінула яго». ⁵³53 Тады бацька зразумеў, што гэта была тая самая гадзіна, калі Езус сказаў яму: «Жыве сын твой». І паверыў ён сам і ўвесь дом ягоны. ⁵⁴Гэта быў другі знак, які ўчыніў Езус, калі прыйшоў з Юдэі ў Галілею.

Разважанне да Божага слова

Для Бога няма межаў часу, прасторы, чалавечых лімітаў. Езус выразна дэманструе гэта, аздараўляючы сына прыдворнага, які верыць Яго слову і атрымлівае цуд. Успомні моманты, калі Бог умацоўваў цябе, умацоўваў тваю веру. Прынясі у малітве сітуацыі, якія табе здаюцца безнадзейнымі, немагчымымі для перамены. Паспрабуй зноў зірнуць на іх разам з Езусам.
“Сын твой жывы”, – кажа Езус. Уяві, што гэта за навіна для бацькі. Езус вяртае жыццё. Ён ёсць жыццё. Ці прымаеш ты Яго слова, як прыдворны? Езус хоча ісці з табой сцежкамі тваёй Галілеі. Запрасі Яго ў сваё паўсядзённае жыццё.

Размова

Езу, Ты прамаўляеш да мяне праз словы Евангелля.
Прагну сёння адказаць на Твой заклік.
Навучы мяне распазнаваць Тваю руку сярод паўсядзённых спраў.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн