Прысутнасць

Запавольваюся і думаю пра любоў
і ласку, якімі Бог ахінае мяне:
Я створаны паводле вобразу і падабенству Божаму;
у глыбіні майго сэрца жыве Бог .

Свабода

Мне трэба суцішыцца, падняцца над шумам,
які перашкаджае, раздзяляе,
ізалюе.
Мне вельмі неабходна зноў слухаць Бога ў цішыні і спакоі.

Усведамленне

Духу Святы, прыйдзі і пасяліся ўва мне. Дай мне пазнаць, што я ўмілаванае дзіця Божае.

Божае слова

¹⁷А Езус адказаў юдэям: «Айцец Мой дзейнічае дагэтуль, і Я дзейнічаю». ¹⁸За гэта юдэі яшчэ больш намагаліся забіць Яго, бо Ён не толькі зняважыў шабат, але таксама называў Бога сваім Айцом, робячы сябе роўным Богу. Улада, дадзеная Айцом Сыну

¹⁹Тады Езус сказаў ім у адказ: «Сапраўды, сапраўды кажу вам: не можа Сын рабіць сам ад сябе нічога, калі б не бачыў Айца, які робіць. Бо што робіць Ён, тое таксама робіць Сын. ²⁰ Бо Айцец любіць Сына і паказвае Яму ўсё, што сам робіць, і пакажа Яму справы большыя за гэтыя, каб вы дзівіліся. ²¹Бо як Айцец уваскрашае мёртвых і ажыўляе, так і Сын ажыўляе тых, каго хоча. ²²Бо Айцец нікога не судзіць, але ўвесь суд аддаў Сыну, ²³каб усе шанавалі Сына, як шануюць Айца. Хто не шануе Сына, той не шануе Айца, які паслаў Яго. ²⁴Сапраўды, сапраўды кажу вам: хто слухае Маё слова і верыць у таго, хто паслаў Мяне, мае жыццё вечнае і не прыходзіць на суд, але перайшоў ад смерці да жыцця.

²⁵Сапраўды, сапраўды кажу вам: надыходзіць гадзіна і ўжо настала, калі мёртвыя пачуюць голас Сына Божага, і якія пачуюць, ажывуць. ²⁶Бо, як Айцец мае ў сабе жыццё, так і Сыну даў мець жыццё ў сабе. ²⁷І даў Яму ўладу вяршыць суд, бо Ён Сын Чалавечы. ²⁸Не здзіўляйцеся гэтаму, бо надыходзіць гадзіна, калі ўсе, хто ў магілах, пачуюць голас Ягоны, ²⁹і выйдуць, хто чыніў дабро, каб уваскрэснуць для жыцця, а хто рабіў зло, каб уваскрэснуць для асуджэння.

³⁰Я нічога не магу рабіць ад сябе. Як чую, так суджу, і суд Мой справядлівы, бо Я не шукаю сваёй волі, але волі таго, хто паслаў Мяне.

Разважанне да Божага слова

Звычайна мы не любім неспадзяванак. Нават калі нечакана перажываем нешта добрае, здарэнне часта выклікае трывогу. Аздараўленне ў суботу было настолькі нечаканым для габрэяў, што яны з-за страху пачалі ўспрымаць Езуса як пагрозу. Часам нам хочацца, каб Бог быў стабільным і прадказальным. Аднак сёння Ён паказвае, што з’яўляецца жывым Богам: шматгранным, нечаканым. Жыццё ў сяброўстве з такім дынамічным і нечаканым Богам можа здацца вар'яцтвам або небяспекай. А Езус выразна кажа, што той, хто чуе Яго слова, хто верыць у Яго, ужо мае вечнае жыццё. У малітве паспрабуй адкрыць сэрца, каб напоўніць яго прысутнасцю Бога, які дае жыццё.

Размова

Добры Езу, я магу адкрыць Табе сэрца.
Магу сказаць Табе ўсё, што мяне турбуе.
Я ведаю, што Цябе хвалююць усе мае клопаты.
Навучы мяне жыць, не забываючыся,
што Ты ахінаеш мяне апекай сёння
і будзеш клапаціцца заўтра і ва ўсе дні жыцця майго.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн