Прысутнасць

Божа, Ты бліжэй, чым я магу паверыць, бліжэй, чым маё дыханне. Твая блізкасць – благаслаўленне, і мне не трэба баяцца.

Свабода

Вядзі мяне заўсёды выконваць Тваю святую волю,
ведаючы, што Твая магутнасць
дапаможа ва ўсім.

Усведамленне

Мы ўсе пілігрымы ў дарозе да Цябе, Пане.
Дай нам сузіраць Цябе на зямлі
і з Тваёй дапамогай ісці па Тваіх слядах.

Божае слова

¹Пасля гэтага хадзіў Езус па Галілеі. Ён не хацеў хадзіць па Юдэі, бо юдэі намагаліся забіць Яго. ²Набліжалася юдэйскае свята Шатроў.

¹⁰Калі браты Ягоныя прыйшлі на свята, тады і Ён прыйшоў, аднак не адкрыта, а як бы патаемна.

²⁵Некаторыя з жыхароў Ерузалема казалі: «Ці не той гэта, якога хочуць забіць? ²⁶I вось Ён адкрыта гаворыць, і нічога не кажуць Яму. Хіба старэйшыны на самой справе пераканаліся, што Ён Месія? ²⁷Але мы ведаем, адкуль Ён. Калі ж прыйдзе Месія, то ніхто не будзе ведаць, адкуль Ён». ²⁸Тады Езус, навучаючы ў святыні, прамовіў голасна: «I Мяне ведаеце, і ведаеце адкуль Я. І не сам ад сябе Я прыйшоў, але праўдзівы той, хто паслаў Мяне, якога вы не ведаеце. ²⁹Я ведаю Яго, бо Я ад Яго, і Ён паслаў Мяне». ³⁰Тады шукалі, як схапіць Яго, але ніхто не падняў на Яго рукі, бо яшчэ не настала Ягоная гадзіна.

Разважанне да Божага слова

Езус становіцца крыніцай пэўнай блытаніны ў свядомасці некаторых людзей. З аднаго боку, вядома, што Ён стаў мішэнню іх рэлігійных лідэраў, аднак Ён ходзіць адкрыта, свабодна і прамаўляе без страху. Слова Божае не можа маўчаць. У дадатак людзі таксама блытаюцца адносна асобы Езуса. Ці Ён сапраўды Месія-Хрыстус? Але ўсе ведаюць, што з Назарэта не можа паходзіць Месія. Ці сапраўды мы ведаем, хто такі Езус? Вялікі пост – выдатны час, каб глыбей пазнаваць Яго праз Святое Пісанне, разважанні і малітву. І пачаць рабіць гэта практыкай, якая выходзіць далёка за рамкі Вялікага посту.

Размова

Езус часта задаваў пытанні тым, хто прыходзіў да Яго.
Адчуваючы Яго цяпер побач,
уяўлю, што Ён пытаецца ў адказ на маю малітву:
“Чаго ты жадаеш?”
“Як табе дапамагчы?”
“Што Я магу табе даць?”

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн