Прысутнасць

Чым часцей мы клічам Бога, тым лепш адчуваем Яго прысутнасць. Дзень за днём мы набліжаемся да Божага Сэрца, напоўненага Любоўю.

Свабода

Вядзі мяне заўсёды выконваць Тваю святую волю,
ведаючы, што Твая магутнасць
дапаможа ва ўсім.

Усведамленне

Нябесны Ойча, дазволь мне ўзрастаць у цноце, слухаючы Цябе і прабываючы з Табой. Няхай Твая дабрыня перапаўняе маё жыццё і пераліваецца з майго жыцця ў жыццё ўсіх тых, каго я сустракаю.

Божае слова

⁴⁰З натоўпу, пачуўшы гэтыя словы, казалі: «Ён сапраўды прарок!» ⁴¹Другія казалі: «Гэта Месія!» А іншыя казалі: «Хіба з Галілеі прыйдзе Месія? ⁴²Ці ж не сказана ў Пісанні, што Месія прыйдзе з роду Давіда і з мястэчка Бэтлеема, адкуль быў Давід?» ⁴³І вось адбылася з-за Яго спрэчка ў натоўпе. ⁴⁴Некаторыя з іх хацелі схапіць Яго, але ніхто не падняў на Яго рукі.

⁴⁵Прыйшлі ж слугі да першасвятароў і фарысеяў, а тыя сказалі ім: «Чаму вы не прывялі Яго?» ⁴⁶Слугі адказалі: «Ніколі ніхто з людзей так не гаварыў». ⁴⁷Фарысеі адказалі ім: «Няўжо і вас увялі ў зман? ⁴⁸Хіба паверыў у Яго хто са старэйшын або з фарысеяў? ⁴⁹Але гэты натоўп, які не ведае Закону, пракляты!» ⁵⁰Тады Нікадэм, адзін з іх, які прыходзіў да Езуса раней, сказаў ім: ⁵¹«Ці наш Закон асуджае чалавека, пакуль не выслухаюць яго і не даведаюцца, што ён робіць?» ⁵²На гэта адказалі яму: «Ці і ты з Галілеі? Даследуй і ўбачыш, што з Галілеі прарок не выйдзе!»

[[

Разважанне да Божага слова

Сёння мы маем працяг учорашняй блытаніны адносна асобы Езуса. Заўважны выразны канфлікт паміж тым, што людзі бачаць і чуюць, і тым, у што іх вучылі верыць.
Нам трэба памятаць, што мы чытаем гэты ўрывак не для таго, каб асудзіць габрэйскіх старэйшын ці фарысеяў, а для таго, каб паразважаць над уласнай прадузятасцю і недальнабачнасцю. Як мы бачым Езуса, Святое Пісанне, Касцёл, парафіяльную супольнасць? Як мы бачым сваю сям'ю, сяброў, суседзяў, не кажучы ўжо пра незнаёмцаў?
Памолімся аб адкрытым розуме, каб прыняць пасланне Езуса ў поўнай меры. Калі быць шчырымі, у кожным з нас ёсць нешта ад фарысея.

Размова

Добры Езу, я магу адкрыць Табе сэрца.
Магу сказаць Табе ўсё, што мяне турбуе.
Я ведаю, што Цябе хвалююць усе мае клопаты.
Навучы мяне жыць, не забываючыся,
што Ты ахінаеш мяне апекай сёння
і будзеш клапаціцца заўтра і ва ўсе дні жыцця майго.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн