Прысутнасць

На момант я спыняюся і разважаю пра жыватворчую прысутнасць Бога
Думаю, як рэчаіснасць навокал,
паветра, усё маё цела
іскрыць прысутнасцю Бога.

Свабода

Малюся аб ласцы, каб паверыць
у тое, кім я магу стаць і што рабіць,
калі толькі дазволю Богу, майму Стварыцелю, які так мяне любіць,
працягваць ствараць, накіроўваць і фармаваць мяне.

Усведамленне

Падумаю, як сябе адчуваю.
Ці стомлены мацней, чым звычайна, напружаны або знерваваны?
Калі штосьці падобнае адбываецца,
паспрабую на час малітвы выпусціць з увагі клопаты, якія мяне турбуюць.

Божае слова

¹У першы дзень тыдня Марыя Магдалена прыйшла да магілы раніцай, калі было яшчэ цёмна, і ўбачыла, што камень адсунуты ад магілы. ²2 Тады пабегла і прыйшла да Сымона Пятра і да другога вучня, якога любіў Езус, і сказала ім: «Забралі Пана з магілы, і не ведаем, дзе паклалі Яго!» ³3 Тады выйшаў Пётр і другі вучань, і пайшлі да магілы. ⁴Пабеглі абодва разам. Другі вучань пабег наперадзе хутчэй за Пятра і прыбыў да магілы першы. ⁵Заглянуўшы, убачыў, што ляжаць палотны, аднак не ўвайшоў. ⁶Тады прыйшоў услед за ім Сымон Пётр, увайшоў у магілу і ўбачыў палотны, якія там ляжалі, ⁷і хусту, якая была на галаве Ягонай, не з палотнамі яна ляжала, а асобна, скручаная на іншым месцы. ⁸8Тады ўвайшоў і другі вучань, што прыбег першы да магілы, убачыў і паверыў. ⁹Бо яны яшчэ не ведалі Пісання, што трэба было Яму ўваскрэснуць з мёртвых.

Разважанне да Божага слова

Дзіўны гэты світанак; мы молімся ў цемры, за межамі часу, нібы касманаўты, якія кружацца вакол Зямлі: па-за заходамі і ўсходамі сонца, ахопліваючы позіркам пачатак і канец дзён. Мы згадваем тую неймаверную раніцу, калі апосталы ўбачылі святых жанчын, якія вярнуліся ад магілы са словамі анёлаў. Абяскроўленае Цела, працятае дзідай, паўстала са смерці да новага жыцця, поўнага таямніцы. Езус стрымаў сваё абяцанне. Смерць, наш найстаражытнейшы вораг, пераможана Ім.

Вобраз пустой магілы ў нашым жыцці можа азначаць увесь той досвед смерці, болю, цярпення, усяго, што ёсць супрацьлегласцю жыцця, – нам не варта там шукаць Жывога, Езуса. Прызнаючы той факт, што гэтая магіла пустая, нам трэба рухацца далей, каб сустрэцца з Езусам жывым, а не плакаць над Яго смерцю, якая з’яўляецца толькі этапам, і над нашымі смерцямі, якія таксама – толькі этапы, бо пасля фізічнай смерці і ўсіх нашых «малых смерцяў» уваскрослы Езус дае нам шанец паўставаць зноў, уваскрасаць, ісці далей, сустракаючы Яго жывога.

Размова

Пане, дапамажы мне злучыцца з Табою. Я не заўсёды ведаю, як, але хачу атрымаць Тваю любоў і адкрываю далоні і сэрца. Калі ласка, прыдзі да мяне сёння.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн