Прысутнасць

Я чую, як Пан ціха вымаўляе маё імя, запрашаючы ў малітву. Адпускаю ўсё, што перашкаджае засяродзіцца, і занурваюся ў благаславёную блізкасць Бога.

Свабода

Пане, Ты даў мне вялікі дар свабоды.
У гэтыя часы, Пане, вызваляй мяне
ад любой формы расізму або нецярпімасці.
Нагадай мне, Пане, што ўсе мы роўныя
у Тваіх любячых вачах.

Усведамленне

Дапамажы мне, Пане, лепш усведамляць Тваю прысутнасць.
Навучы мяне распазнаваць Тваю прысутнасць у іншых.
А сэрца напоўні ўдзячнасцю за выпадкі, калі Ты дзейнічаў праз іншых людзей, выяўляючы нязмерную любоў і клопат.

Божае слова

³⁵ Яны таксама расказалі пра тое, што здарылася ў дарозе, і як пазналі Яго ў ламанні хлеба.

³⁶Калі яны казалі пра гэта, сам Езус стаў сярод іх і сказаў ім: «Спакой вам!» ³⁷Збянтэжаныя і напалоханыя, яны думалі, што бачаць духа. ³⁸Але Ён сказаў ім: «Чаму разгубіліся, і чаму сумненні ўзніклі ў вашых сэрцах? ³⁹Паглядзіце на Мае рукі і ногі: гэта Я! Дакраніцеся да Мяне і пераканайцеся: дух не мае цела і касцей; як бачыце, Я іх маю». ⁴⁰Пасля гэтых слоў Ён паказаў ім рукі і ногі. ⁴¹А калі яны ад радасці яшчэ не верылі і дзівіліся, Ён сказаў ім: «Ці маеце тут што з’есці?» ⁴²Яны падалі Яму кавалак печанай рыбы. ⁴³Ён узяў і еў перад імі.

⁴⁴І сказаў ім: «Вось словы Мае, сказаныя вам, калі Я быў яшчэ з вамі, што павінна збыцца ўсё напісанае пра Мяне ў Законе Майсея, у Прарокаў і ў Псальмах». ⁴⁵Тады адкрыў іх розум, каб яны разумелі Пісанне. ⁴⁶І сказаў ім: «Так напісана, што Месія павінен цярпець і ўваскрэснуць на трэці дзень з мёртвых, ⁴⁷і ў Ягонае імя павінна абвяшчацца пакаянне дзеля адпушчэння грахоў усім народам, пачынаючы ад Ерузалема. ⁴⁸ А вы — сведкі гэтага.

Разважанне да Божага слова

Вучні, утоеныя ў Вячэрніку, былі настолькі напалоханыя, што з'яўленне Езуса выклікала не радасць, а страх. Ён размаўляе з імі, дае дакрануцца да сябе, есць з імі, але яны застаюцца здзіўленымі і недаверлівымі. Падумай, якія страхі ці сумневы перашкаджаюць тваёй веры?
Езус сваёй ласкай асвятляе розумы вучняў, дае ім магчымасць стаць сведкамі Ягонага ўваскрасення. Папросім і мы даць нам ласку адкрытага сэрца і светлага розуму для сведчання аб Божай моцы ўсяму свету.

Размова

Бог прыйшоў прынесці жыццё, у Целе і ў Слове. Якое жыватворнае слова я атрымаў сёння? Ці, калі мяне нічога не кранула ў малітве, адчуваю жыватворную прысутнасць Езуса побач са мной – у гэтую хвіліну?

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн