Прысутнасць

На момант я спыняюся і разважаю пра жыватворчую прысутнасць Бога
Думаю, як рэчаіснасць навокал,
паветра, усё маё цела
іскрыць прысутнасцю Бога.

Свабода

Пане, Ты стварыў мяне жыць у свабодзе.
У асноўным я ўспрымаю гэты дар як належнае.
Натхні мяне жыць у свабодзе, якую Ты задумаў для мяне,
са спакойным сэрцам і поўным даверам да Цябе.

Усведамленне

Ведаючы, што Бог любіць мяне безумоўна,
Я магу дазволіць сабе быць шчырым.
Як прайшоў мінулы дзень і што я адчуваю зараз?
Распавядаю пра свае пачуцці Пану.

Божае слова

¹⁵Ён сказаў ім: «Ідзіце па ўсім свеце і абвяшчайце Евангелле ўсякаму стварэнню. ¹⁶Хто паверыць і ахрысціцца, будзе збаўлены, а хто не паверыць, будзе асуджаны. ¹⁷Тым, хто паверыць, будуць спадарожнічаць такія знакі: у Маё імя будуць выганяць злых духаў; будуць размаўляць новымі мовамі; ¹⁸змеяў рукамі браць будуць, і, калі штосьці атрутнае вып’юць, не пашкодзіць ім. На хворых будуць ускладаць рукі і яны выздаравеюць».

¹⁹Пасля размовы з імі Пан Езус узнёсся ў неба і сеў праваруч Бога. ²⁰А яны пайшлі і паўсюль прапаведавалі. Пан садзейнічаў ім і пацвярджаў слова знакамі, што яму спадарожнічалі.]]

Разважанне да Божага слова

Ідзіце… Так пачынае сваю прамову Пан Езус. Значыць, вучні не могуць застацца на тым самым месцы, не могуць сядзець і чакаць. І сёння Езус таксама заклікае рухацца, рабіць штосьці канкрэтнае. Магчыма, табе камфортна там, дзе ты ёсць. Магчыма, там ты адчуваеш сябе ў бяспецы, табе ўтульна і цёпла. Ісці – значыць развітацца з гэтым прыемным месцам і, у пэўным сэнсе, пераадолець сябе. Таму гэта запрашэнне і да змены светапогляду. Езус запрашае апосталаў і цябе да місіі, якая з'яўляецца незвычайным выклікам. Ты прымеш яго?

Заклік ісці – гэта таксама заклік абвяшчаць тое, што мы нядаўна перажылі і пра што нам нагадвае гэты час: уваскрасенне Хрыста, які жыве і чыніць вялікія рэчы сярод нас. Будзем прасіць Пана даць сілы ісці і абвяшчаць Евангелле ўсім сваім жыццём.

Размова

Езу, Ты прамаўляеш да мяне праз словы Евангелля.
Прагну сёння адказаць на Твой заклік.
Навучы мяне распазнаваць Тваю руку сярод паўсядзённых спраў.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн