Прысутнасць

У пачатку сённяшняй малітвы звярну ўвагу на сваё дыханне, якое з’яўляецца для мяне Божым дарам, які падтрымлівае жыццё. Адну-дзве хвіліны дыхаю больш павольна, глыбока і спакойна.

Свабода

«У тыя дні Бог вучыў мяне,
як школьны настаўнік вучня» (св. Ігнацый).
Я нагадваю сабе, што ёсць рэчы, якім Бог яшчэ не навучыў мяне,
і прашу адарыць ласкай, каб пачуць іх і дазволіць змяніць мяне.

Усведамленне

Пане, Ты назваў мяне «святлом свету».
Дазволь мне заўсёды ведаць, каму Ты хочаш, каб я служыў:
галодным і бяздомным,
хворым і абяздоленым,
чужынцам і бежанцам.

Божае слова

¹Сапраўды, сапраўды кажу вам: хто ўваходзіць не праз браму на авечы двор, але прабіраецца інакш, той злодзей і злачынец. ²А хто ўваходзіць праз браму, той пастыр авечак. ³Брамнік яму адчыняе, і авечкі слухаюцца голасу ягонага; кліча сваіх авечак па імені і выводзіць іх. ⁴ А калі ўсіх выведзе, ідзе перад імі, і авечкі ідуць за ім, бо ведаюць ягоны голас. ⁵За чужым не ідуць, але ўцякаюць ад яго, бо не ведаюць голасу чужых». ⁶Такую прыпавесць сказаў ім Езус, але яны не зразумелі, што Ён казаў ім.

⁷Тады Езус зноў сказаў: «Сапраўды, сапраўды кажу вам: Я – брама для авечак. ⁸Усе, колькі іх прыходзіла перада Мною, – гэта злодзеі і злачынцы, і авечкі не паслухалі іх. ⁹Я — брама. Калі хто ўвойдзе праз Мяне, будзе збаўлены, і ўвойдзе, і выйдзе, і знойдзе пашу. ¹⁰Злодзей прыходзіць дзеля таго, каб красці, забіваць і нішчыць. Я прыйшоў, каб вы мелі жыццё і мелі ў дастатку.

Разважанне да Божага слова

Мы жывём сярод мноства розных гукаў. Удзельнічаем у размовах, слухаем музыку, падкасты і кнігі. У гэтым патоку Бог таксама прамаўляе, а Ягоная мова – мова любові. Вярніся да Яго слоў, якія асабліва кранулі тваё сэрца апошнім часам.

У сённяшнім Евангеллі Пан дае абяцанне жыцця ў паўнаце. Вернае прабыванне ў Божай прысутнасці праз малітву, слуханне Слова, жыццё паводле сакрамэнтаў, любоў адно да аднаго – праз гэта ўсё Ён вядзе цябе на Сваю пашу. Бог таксама хоча гаварыць да людзей цераз цябе. Няхай жа Ягоны голас будзе пачуты ў тваіх словах, жэстах, ціхай малітве, усмешцы, дапамозе.

Размова

“Няма цяпер ніякага асуджэння тым, хто ў Хрысце Езусе” (Рым 8:1). Я звяртаюся да Таго, Хто любіць мяне і ведае мяне лепш, чым я магу любіць ці ведаць сябе. Прашу Яго аб тым, што мне цяпер патрэбна.

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн