Прысутнасць

Перад тым, як пачаць малітву, паслухаю біццё сэрца,
рытм дыхання, плынь думак –
прыкметы няспыннага стваральнага дзеяння Бога ўва мне.
Затрымаюся на момант і адчую
гэтую Божую прысутнасць.

Свабода

Напоўні мяне Духам Тваім Святым, Пане,
дзеля ўнутранай свабоды.
Няхай Твой Дух узбудзіць у сэрцы
жаданне ведаць і любіць Цябе з кожным днём усё больш.

Усведамленне

Пане, Ты прысутны ва ўсім
і калі я знаходжу час, каб проста пасядзець і пабыць з Табой,
мой розум адпачывае
і я адчуваю Твой супакой.

Божае слова

¹¹Я — добры пастыр. Добры пастыр аддае жыццё сваё за авечак. ¹²Найміт і не пастыр, якому не належаць авечкі, калі бачыць, што прыходзіць воўк, кідае авечак і ўцякае, а воўк хапае і разганяе іх. ¹³Уцякае, бо ён найміт і не клапоціцца пра авечак. ¹⁴Я — добры пастыр і ведаю сваіх, а Мае ведаюць Мяне, ¹⁵як Мяне ведае Айцец і Я ведаю Айца. Я жыццё сваё аддаю за авечак. ¹⁶Ёсць у Мяне таксама іншыя авечкі, якія не з гэтага двара. І гэтых Мне трэба прывесці, і яны будуць слухаць голас Мой, і будзе адзін статак і адзін пастыр. ¹⁷За тое любіць Мяне Айцец, што Я аддаю жыццё сваё, каб узяць яго зноў. ¹⁸Ніхто не адбірае яго ў Мяне, але Я сам аддаю яго. Я маю ўладу яго аддаць і маю ўладу зноў узяць яго. Такую запаведзь Я атрымаў ад Айца Майго».

Разважанне да Божага слова

Вобраз Езуса Добрага Пастыра, які мы знаходзім у сённяшнім чытанні, вельмі суцяшае душу. Нам лёгка ўявіць Яго такім. Відавочна, ён вельмі падабаўся і першым хрысціянам, паколькі яго можна не раз убачыць на роспісах у рымскіх катакомбах. Ты, Пане, гатовы зрабіць усё магчымае, каб ніводная авечка не згубілася. Узгадваю шматлікія выпадкі, калі я сам неразумна збочваў з добрага шляху, і прашу Цябе: калі гэта паўторыцца, уратуй мяне.

Размова

Божае Слова заўсёды плённае.
Ці гэта актуальна для мяне цяпер,
калі гляджу на тое, як прайшла малітва?
Ці адчуваю суцяшэнне?
Ці былі нейкія цяжкасці і выклікі?

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн