Прысутнасць

Пане, Ты заўсёды побач
і чакаеш мяне.
Прагну жыць так, каб ніколі не быць занадта занятым
і не адкладаць сустрэчы з Табой.

Свабода

Пане, я малюся аб Тваім дары свабоды.
Няхай Твой Святы Дух
вядзе тых, хто ва ўладзе, працаваць дзеля
сапраўднай справядлівасці для ўсяго Божага народу.

Усведамленне

Я існую ў сетцы адносін з прыродай, людзьмі, Богам.
Я прасочваю гэтыя ланцужкі сувязяў, дзякую за жыццё, якое цячэ па іх.
Некаторыя звёны пашкоджаныя або зламаныя: і адчуваю з-за гэтага жаль, гнеў, горыч.
Малюся аб дары прыняцця і прабачэння.

Божае слова

²²Настала тады ў Ерузалеме свята Пасвячэння святыні. Была зіма, ²³і Езус хадзіў у святыні па портыку Саламона. ²⁴Абступілі Яго юдэі і казалі Яму: «Дакуль будзеш трымаць нас у няпэўнасці? Калі Ты Месія, скажы нам адкрыта!» ²⁵Езус адказаў ім: «Я сказаў вам, і вы не верыце. Справы, якія Я чыню ў імя Айца Майго, сведчаць пра Мяне. ²⁶Але вы не верыце, бо вы не з Маіх авечак. ²⁷Авечкі Мае слухаюць голас Мой, і Я ведаю іх, і яны ідуць за Мною. ²⁸Я даю ім вечнае жыццё навекі, і яны не загінуць ніколі, ніхто не вырве іх з рукі Маёй. ²⁹Айцец Мой, які даў Мне іх, большы за ўсіх. І ніхто не можа вырваць іх з рукі Айца. ³⁰Я і Айцец — адно».

Разважанне да Божага слова

Калі малітва і маё хрысціянскае жыццё пустыя і змярцвелыя, то ці не сталася так таму, што я "не веру" ўсяму, што Езус сказаў пра сваю любоў да мяне?

Юдэі адважна падыйшлі да Езуса і задалі пытанне, якое не давала ім спакою. Як жа часта кожнаму з нас хочацца проста сказаць Езусу: “Калі Ты побач, дай мне знак”. Юдэі прагнуць каб Ён казаў адкрыта. І Ён не хаваецца, кажа, што яны ўбачылі дастаткова, каб паверыць у Яго. Можаш працягваць дыялог з Езусам у гэтай малітве, на працягу дня, падчас вячэрняга рахунку сумлення.

Размова

Часам я задаюся пытаннем, што б я сказаў, калі б сустрэўся з Табой асабіста, Пане.
Магчыма, так: “Дзякую, Божа, што Ты заўсёды са мной”.
Я дакладна ведаю, што былі часы, калі Ты нёс мяне, Пане,
калі дзякуючы Тваёй сіле я перажыў цёмныя перыяды жыцця.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн