Прысутнасць

Бог чакае мяне, Ён тут,
удыхаючы жыццё ў мяне і ва ўсё, што навокал мяне.
Застаюся ў цішыні адну-дзве хвіліны
і ўсведамляю Божую любячую прысутнасць.

Свабода

Пане, я малюся аб Тваім дары свабоды.
Няхай Святы Дух
натхняе людзей ва ўладзе працаваць на карысць
сапраўднай справядлівасці для ўсяго Божага народу.

Усведамленне

Пане, Ты даў мне начны адпачынак.
У дзённы час не дазволь мне забыцца пра Тваю дабрыню.
Накіруй мяне і пакажы, як дзяліцца Тваімі благаслаўленнямі з іншымі.

Божае слова

⁴⁴Езус усклікнуў і сказаў: «Хто верыць у Мяне, не ў Мяне верыць, а ў таго, хто паслаў Мяне. ⁴⁵І хто бачыць Мяне, бачыць таго, хто паслаў Мяне. ⁴⁶Я, святло, прыйшоў на свет, каб кожны, хто верыць у Мяне, не заставаўся ў цемры. ⁴⁷І калі хто пачуе словы Мае і не захавае іх, Я не суджу яго. Бо Я прыйшоў не судзіць свет, а збавіць свет. ⁴⁸48 Хто пагарджае Мною і не прымае Маіх словаў, той мае сабе суддзю — слова, якое Я абвяшчаў, яно будзе судзіць яго ў апошні дзень. ⁴⁹49 Бо Я казаў не ад сябе, але Айцец, які паслаў Мяне, Ён даў Мне запаведзь, што казаць і што гаварыць. ⁵⁰І Я ведаю, што запаведзь Ягоная — гэта жыццё вечнае. Таму тое, што Я кажу, кажу так, як сказаў Мне Айцец».

Разважанне да Божага слова

Святая Кацярына Сіенская казала: «Дзе мы бачым грахі, Бог бачыць слабасць». Яна разумее, што многія людзі спрабуюць рабіць усё магчымае, але недахопы і няўдачы часта перамагаюць іх. Бог бачыць сэрца і бачыць нашыя намаганні рабіць дабро, нават беспапяховыя. Божы Дух, дадзены свету з безліччу дароў, таксама прыносіць дар Божага прабачэння.

Кожны з нас перажывае моманты сумненняў, стомы, цяжару праблем. Не заўсёды лёгка знайсці выйсце з гэтых сітуацый. Езус хоча, каб мы ведалі ў цяжкія хвіліны, што менавіта ў Яго абдымках мы можам знайсці супакой, суцяшэнне і сілу. У цяжкія хвіліны мы прыходзім да Яго – у кароткай малітве сэрца, у просьбе аб дапамозе, у маўчанні. Што ты прыносіш Езусу сёння? Раскажы Яму пра гэта.

Размова

Маўкліва сяджу з маім Богам, які ведае кожную маю думку, кожную патрэбу і кожнае жаданне, і дазваляю Яму служыць мне ў гэты момант. Я атрымліваю неабходны для далейшай дарогі пасілак.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн