Прысутнасць

Прыгадаю сабе, што ў гэты момант,
Бог глядзіць на мяне з любоўю і падтрымлівае жыццё.
Затрымаюся на некаторы час у Ягоным позірку.

Свабода

Усё мае патэнцыял здабыць з мяне большую паўнату любові і жыцця.
Аднак мае жаданні часта чапляюцца за ілюзіі спаўнення.
Прашу Цябе, Божа, праз маю свабоду дырыжыруй маімі жаданнямі так,
каб гучала жывая гарманічная мелодыя любові як спаўненне Тваёй волі ўва мне і праз мяне.

Усведамленне

Дзе ў сваім жыцці я адчуваю надзею, заахвочванне і бачу перспектывы росту? Прыгадваючы мінулыя некалькі месяцаў, ці не адчуваю я, якая дзейнасць і якія падзеі прыносілі багаты плён? Калі так, то прымаю рашэнне прысвячаць ім больш часу у будучыні.

Божае слова

¹⁶Сапраўды, сапраўды кажу вам: слуга не большы за свайго гаспадара, і пасланнік не большы за таго, хто паслаў яго. ¹⁷Калі гэта ведаеце і чыніце так, вы шчаслівыя. ¹⁸Не пра ўсіх вас кажу. Я ведаю, каго выбраў. Але няхай збудзецца Пісанне: “Хто есць са Мною хлеб, падняў на Мяне пяту сваю”. ¹⁹Цяпер, перш чым гэта станецца, кажу вам, каб, калі станецца, вы паверылі, што Я ёсць.
^{, 20}Сапраўды, сапраўды кажу вам: хто прымае таго, каго Я пашлю, Мяне прымае, а хто Мяне прымае, прымае таго, хто паслаў Мяне».

Разважанне да Божага слова

На Апошняй вячэры Езус абмывае ногі вучням, служыць ім жэстам любові, пакоры і павагі – нават да тых, хто быццам бы гэтага не заслугоўвае. Настаўнік сам выбірае вучняў, але пакідае ім свабоду, нават свабоду адрачыся і здрадзіць. Гэта цана любові і павагі. Якія твае адносіны з людзьмі? Ці паважаеш тых, з чыім жыццёвым выбарам нязгодны? Ці здольны ты даць свабоду тым, каго любіш?

Прымаючы той факт, што Ён пасылае цябе ў свет, памятай, што ты не мусіш ісці за самім сабой, сваімі планамі, амбіцыямі ці нават за ідэямі, якія здаюцца бліскучымі. Самае галоўнае – абвяшчэнне Хрыста. Той, хто прымае цябе і слухае, прымае Езуса. Дбай аб тым, каб не засланяць Яго сабой.

Размова

Якія пачуцці, пытанні, сумненні ці натхненні выклікала ўва мне сённяшняе Евангелле? Аддаю Езусу ўсё, што адчуваю і думаю, ведаючы, што Ён сапраўды са мной быў, ёсць і будзе.

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн