Прысутнасць

Кожны момант напоўнены хвалебнай прысутнасцю Бога. Калі я ўсё больш і больш аддаюся цеснай еднасці з Тым, хто стварыў мяне, адкрываю, што ў мяне проста няма часу турбавацца.

Свабода

«У тыя дні Бог вучыў мяне,
як школьны настаўнік вучня» (св. Ігнацый).
Я нагадваю сабе, што ёсць рэчы, якім Бог яшчэ не навучыў мяне,
і прашу адарыць ласкай, каб пачуць іх і дазволіць змяніць мяне.

Усведамленне

О, Пане, дапамажы мне заўсёды
усведамляць важныя рэчы ў жыцці,
клапаціцца пра тых, хто побач,
шукаць Тваёй прысутнасці ва ўсіх, каго сустракаю.

Божае слова

¹⁶Адзінаццаць вучняў пайшлі ў Галілею на гару, куды загадаў ім Езус. ¹⁷І калі Яго ўбачылі, пакланіліся Яму, але некаторыя засумняваліся. ¹⁸Тады Езус наблізіўся да іх і сказаў ім: «Дадзена Мне ўсялякая ўлада на небе і на зямлі. ¹⁹Дык ідзіце і навучайце ўсе народы, і хрысціце іх у імя Айца і Сына, і Духа Святога. ²⁰Вучыце іх захоўваць усё, што Я загадаў вам. І вось Я з вамі ва ўсе дні, аж да сканчэння веку».

Разважанне да Божага слова

Мы сузіраем малітву Езуса за вучняў. Яны дапушчаны да вельмі блізкіх адносінаў паміж Сынам і Айцом. Езус не толькі адкрывае вучням таямніцы Бога, але, перш за ўсё, адкрывае адносіны любові паміж Асобамі Святой Тройцы і іх невымерны клопат пра чалавецтва. Ці даводзілася табе праз малітву лепш спасцігнуць Бога і тое, як Ён дзейнічае?
Нам неяк цяжка паверыць, што мы ўжо належым Богу. Мы Ягоная ўласнасць, стварэнне і ўмілаваны народ. І гэта было прадбачана для нас з самага пачатку стварэння свету. У Сыне Стварыцель дазваляе нам зразумець нашую ўласную гісторыю. І ўсё ж Бог заўсёды застаецца таямніцай. Таму будзем пакорна і цярпліва прасіць Яго прыняць нас, каб удзельнічаць у Ягоным жыцці. Будзем прасіць Яго паказаць хаця б адзін промень Ягонай хвалы.

Размова

Езу, Ты прамаўляеш да мяне праз словы Евангелля.
Прагну сёння адказаць на Твой заклік.
Навучы мяне распазнаваць Тваю руку сярод паўсядзённых спраў.

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн