Прысутнасць

Я чую, як Пан ціха вымаўляе маё імя, запрашаючы ў малітву. Адпускаю ўсё, што перашкаджае засяродзіцца, і занурваюся ў благаславёную блізкасць Бога.

Свабода

Пане, навучы мяне шанаваць дар свабоды.
Ты даў мне вялікае благаслаўленне свабоды духу.
Напоўні мой дух Тваім супакоем і Тваёй радасцю.

Усведамленне

Я існую ў сетцы адносін з прыродай, людзьмі, Богам.
Я прасочваю гэтыя ланцужкі сувязяў, дзякую за жыццё, якое цячэ па іх.
Некаторыя звёны пашкоджаныя або зламаныя: і адчуваю з-за гэтага жаль, гнеў, горыч.
Малюся аб дары прыняцця і прабачэння.

Божае слова

¹Сказаўшы гэта, Езус узняў вочы свае да неба і сказаў: «Ойча, прыйшла гадзіна. Услаў Сына свайго, каб і Сын уславіў Цябе. ²Ты даў Яму ўладу над усякім целам, каб Ён даў жыццё вечнае ўсяму, што Ты даў Яму. ³А вечнае жыццё ў тым, каб пазналі Цябе, адзінага праўдзівага Бога, і таго, каго Ты паслаў, Езуса Хрыста. ⁴Я ўславіў Цябе на зямлі, выканаўшы справу, якую Ты даручыў Мне зрабіць. ⁵А цяпер Ты, Ойча, услаў Мяне ў сабе хвалою, якую меў Я ў Цябе перад існаваннем свету.

⁶Я адкрыў імя Тваё людзям, якіх Ты даў Мне са свету. Яны былі Тваімі, і Ты даў Мне іх, і яны захавалі слова Тваё. ⁷Цяпер яны пазналі, што ўсё, што Ты даў Мне, паходзіць ад Цябе. ⁸Бо словы, якія Ты даў Мне, Я даў ім, і яны прынялі іх і сапраўды пазналі, што Я выйшаў ад Цябе, і паверылі, што Ты паслаў Мяне. ⁹Я за іх прашу. Не за ўвесь свет прашу, але за тых, каго Ты даў Мне, бо яны Твае. ¹⁰І ўсё Маё — гэта Тваё, і Тваё — гэта Маё, і Я ўславіўся ў іх. ¹¹Я ўжо не ў свеце, але яны яшчэ ў свеце, Я ж іду да Цябе. Ойча святы, захавай іх у імені Тваім, якое Ты даў Мне, каб яны былі адно, як і Мы.

Разважанне да Божага слова

У сённяшнім Евангеллі мы чуем вялікую малітву Езуса да Айца. Тэксты Яна маюць паэтычны і таямнічы характар. Што азначаюць словы Хрыста? Часам, як і ў паэзіі, само па сабе маўклівае чытанне радкоў можа прынесці ўзнагароду. Спрабуй затрымацца на адным выказванні, напрыклад: “А вечнае жыццё ў тым, каб спазналі Цябе, адзінага праўдзівага Бога, і таго, каго Ты паслаў, Езуса Хрыста.” Засвойвай, смакуй, прабывай з гэтымі словамі ў цішыні і маўчанні.

Размова

Добры Езу, я магу адкрыць Табе сэрца.
Магу сказаць Табе ўсё, што мяне турбуе.
Я ведаю, што Цябе хвалююць усе мае клопаты.
Навучы мяне жыць, не забываючыся,
што Ты ахінаеш мяне апекай сёння
і будзеш клапаціцца заўтра і ва ўсе дні жыцця майго.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн