Прысутнасць

“Супакойцеся і ведайце, што Я – Бог”. (Пс 46:10)
Пане, няхай Твой Дух вядзе мяне,
шукаць Тваёй Любячай прысутнасці
больш і больш. Таму што ў ёй
я знаходжу адпачынак і аднаўляю сілы
ў гэтым напружаным свеце.

Свабода

Любыя рэчы, падзеі, з’явы могуць спрычыніцца да ўзрастання ўва мне любові і жыцця,
аднак мае жаданні часта засяроджваюцца на ілюзіях самарэалізацыі.
Я прашу, каб Ты, Божа, праз маю свабоду ўладкаваў мае жаданні так,
каб выявілася хараство мелодыі, багатай на любоў і гармонію, у згодзе з воляй Тваёй.

Усведамленне

Пане, адкрый маё сэрца на тое, каб пачуць і прыняць Тваё Слова. Няхай гэта прынясе вялікі плён у маім жыцці і ў жыцці іншых людзей.

Божае слова

¹¹Я ўжо не ў свеце, але яны яшчэ ў свеце, Я ж іду да Цябе. Ойча святы, захавай іх у імені Тваім, якое Ты даў Мне, каб яны былі адно, як і Мы. ¹²Калі Я быў з імі, Я захоўваў іх у імені Тваім, якое Ты даў Мне. І збярог, і ніхто з іх не загінуў, апроч сына пагібелі, каб збылося Пісанне. ¹³А цяпер іду да Цябе і кажу гэта ў свеце, каб яны мелі ў сабе поўную Маю радасць. ¹⁴Я даў ім слова Тваё, і свет зненавідзеў іх, бо яны не са свету, як і Я не са свету. ¹⁵Не прашу, каб Ты ўзяў іх са свету, а каб захаваў іх ад злога.¹⁶Яны не са свету, як і Я не са свету. ¹⁷Асвяці іх у праўдзе. Слова Тваё — гэта праўда. ¹⁸Як Ты паслаў Мяне ў свет, так і Я паслаў іх у свет. ¹⁹І за іх Я пасвячаю сябе, каб і яны былі асвячаныя ў праўдзе.

Разважанне да Божага слова

Езус пасылае вучняў у свет, ведаючы, што гэта нялёгкая задача, але ў сваёй малітве Ён паказвае, як яе выканаць. Ён просіць Айца асвяціць нас у праўдзе: у Ягоным Слове. Любоў да Пана з'яўляецца падтрымкай у цяжкія хвіліны. Еднасць з Богам, аб якой Хрыстус моліцца, не гарантуе вырашэння праблем, але перадусім ёсць крыніцай шчасця кожнага чалавека. Езус прагне, каб Ягоная радасць цалкам выявілася ў табе. Прыслухайся да слоў малітвы Хрыста і ўспрымай іх асабіста. У апошнія хвіліны свайго жыцця Ён моліцца за цябе.

Размова

Зараз я ўяўляю перад сабой адну з Асобаў Тройцы, Айца, Сына ці Святога Духа, хто прыйдзе ва ўяўленне найбольш натуральным чынам, і вяду сардэчную размову аб сённяшнім фрагменце Пісання або падзях майго жыцця, якія хвалююць мяне ў гэты момант.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн