Прысутнасць

Бог ёсць Эммануэль, Бог-са-мной. Ягоная прысутнасць ахінае мяне прамяністай любоўю. Ён дакладна ведае, што мне патрэбна ў кожны момант. Я ўскладаю ўвесь свой давер на Яго.

Свабода

Так лёгка трапіць
у пастку багацця.
Дай, Пане, свабоду
ад прагнасці і эгаізму.
Нагадвай мне, што лепшыя рэчы ў жыцці бясплатныя:
любоў, смех, клопат і дар.

Усведамленне

Нябесны Ойча, дазволь мне ўзрастаць у цноце, слухаючы Цябе і прабываючы з Табой. Няхай Твая дабрыня перапаўняе маё жыццё і пераліваецца з майго жыцця ў жыццё ўсіх тых, каго я сустракаю.

Божае слова

¹⁵Калі ж яны паснедалі, Езус кажа Сымону Пятру: «Сымоне, сын Яна, ці любіш ты Мяне больш, чым яны?» Той адказаў Яму: «Так, Пане, Ты ведаеш, што я люблю Цябе». Езус кажа яму: «Пасі ягнят Маіх». ¹⁶Зноў кажа яму другі раз: «Сымоне, сын Яна, ці любіш ты Мяне?» Ён адказаў: «Так, Пане, Ты ведаеш, што я люблю Цябе». Езус кажа яму: «Пасі авечак Маіх». ¹⁷І сказаў яму трэці раз: «Сымоне, сын Яна, ці любіш ты Мяне?» Пётр засмуціўся, што трэці раз спытаўся ў яго: «Ці любіш ты Мяне?», і сказаў: «Пане, Ты ўсё ведаеш, Ты ведаеш, што я люблю Цябе». Езус кажа яму: «Пасі авечак Маіх. ¹⁸Сапраўды, сапраўды кажу табе: калі ты быў маладзейшы, то падпяразваўся сам і хадзіў, куды хацеў. Калі ж састарэеш, то выцягнеш рукі свае і іншы падпяража цябе і павядзе, куды не хочаш». ¹⁹А гаварыў так, каб зазначыць, якой смерцю той уславіць Бога. І пасля гэтых слоў, кажа яму: «Ідзі за Мной».

Разважанне да Божага слова

Сустрэча, пра якую мы сёння чытаем, - нібы эпілог, кароткі змест усяго шляху Езуса і вучняў: ад іх паклікання, праз цуды, крыж і ўваскрасенне. Езус урэшце задае найважнейшае пытанне: “Сымоне, ці любіш ты Мяне?” Ведаючы гісторыю свайго шляху з Езусам, як бы ты адказаў, калі б прагучала тваё імя ў Ягоным пытанні?
Святы Ігнацый Лаёла пісаў, што любоў праяўляецца больш у справах, чым у словах. Падумай, якія ўчынкі і адносіны найбольш выразна дэманструюць тваю любоў і адданасць Езусу.
Мы вучымся выказваць любоў усё жыццё, суправаджаючы бліжніх у іх падарожжы. Езу, Настаўнік любові, навучы мяне любіць Цябе больш…

Размова

Зараз я ўяўляю перад сабой адну з Асобаў Тройцы, Айца, Сына ці Святога Духа, хто прыйдзе ва ўяўленне найбольш натуральным чынам, і вяду сардэчную размову аб сённяшнім фрагменце Пісання або падзях майго жыцця, якія хвалююць мяне ў гэты момант.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн