Прысутнасць

Няхай сэрца маё радуецца Тваёй любоўю, Пане.
Дазволь мне пражываць кожны дзень як новы.

Свабода

Пане, дазволь мне заўсёды
выконваць Тваю святую волю,
ведаючы, што Твая моц
правядзе мяне скрозь усе выпрабаванні.

Усведамленне

Часам клопаты гэтага свету ахопліваюць мяне.
У такія хвіліны дазволь мне памятаць
пра раскошу Тваёй прысутнасці,
Тваёй бясконцай любові да мяне.

Божае слова

¹Калі Езус сышоў з гары, следам за Ім пайшло мноства людзей. ²І вось, падышоў пракажоны і кланяўся Яму, кажучы: «Пане, калі хочаш, можаш мяне ачысціць». ³Езус працягнуў руку, дакрануўся да яго і сказаў: «Хачу, будзь ачышчаны!» І той адразу ачысціўся ад праказы. ⁴Езус сказаў яму: «Глядзі, нікому не кажы, але ідзі, пакажыся святару і ахвяруй дар, які наказаў Майсей, на сведчанне ім».

Разважанне да Божага слова

З-за хваробы пракажоны мусіў трымацца здалёк ад здаровых людзей. Ён рызыкаваў, праціскаючыся праз натоўп да Езуса, але прагнуў сустрэцца з Ім. Калі і як ты змагаешся за час для малітвы, і якую каштоўнасць яна мае для цябе?
Невядома, як доўга пракажоны змагаўся са сваёй хваробай, як доўга не бачыў сям'і. Тым больш дзівіць даверлівая просьба, у якой ён “дае свабоду” Езусу ў яе выкананні. “Калі Ты хочаш”… Калі чалавек моліцца і адначасова адкрыты для Божага плана, адбываюцца цуды. Застанься на хвіліну з усім тым, што ўзнікла ў табе падчас гэтай малітвы.

Размова

Пане, Ты выразаў маё імя
на Сваіх далонях.
Нават калі іншыя мяне забываюць,
Ты не забудзеш ніколі.

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн