Прысутнасць

Пане, калі я адчуваю сябе самотным,
нагадай мне пра Тваё абяцанне:
“Ты ніколі не самотны,
Я заўсёды з табой,
так, да канца вякоў” (Мц 28:20).

Свабода

Пане, дазволь мне заўсёды
выконваць Тваю святую волю,
ведаючы, што Твая моц
правядзе мяне скрозь усе выпрабаванні.

Усведамленне

Нам усім трэба на нейкі час аддаляцца ад штодзённых клопатаў.
Мы ведаем, што нашае цела патрабуе адпачынку.
Калі мы прыходзім у прысутнасць Тваю, Пане,
то аднаўляем сэрца, розум і дух.

Божае слова

⁵Калі Езус увайшоў у Кафарнаум, падышоў да Яго сотнік і прасіў Яго, ⁶кажучы: «Пане, слуга мой ляжыць дома паралізаваны і цяжка пакутуе». ⁷Езус cказаў яму: «Я прыйду і вылечу яго». ⁸Сотнік жа адказаў: «Пане, я не варты, каб Ты ўвайшоў пад дах мой, але скажы толькі слова, і будзе аздароўлены слуга мой. ⁹Бо і я чалавек падуладны, сам маю ў падначаленні жаўнераў і кажу аднаму: “Ідзі”, і ідзе, а другому: “Прыйдзі”, і прыходзіць, а слугу майму: “Зрабі тое”, і робіць». ¹⁰Пачуўшы гэта, Езус здзівіўся і сказаў тым, хто ішоў за Ім: «Сапраўды кажу вам, ні ў кога ў Ізраэлі Я не знайшоў такой веры. ¹¹Кажу вам, што многія прыйдуць з усходу і захаду і зоймуць месца за сталом з Абрагамам, Ісаакам і Якубам у Валадарстве Нябесным. ¹²А сыны валадарства будуць выкінуты вон у цемру, там будзе плач і скрыгатанне зубоў». ¹³І сказаў Езус сотніку: «Ідзі, і як паверыў, няхай станецца табе». І быў аздароўлены слуга ягоны ў тую ж гадзіну.

¹⁴Калі Езус прыйшоў у дом Пятра, убачыў цешчу ягоную, якая ляжала ў гарачцы. ¹⁵Ён дакрануўся да яе рукі, і гарачка пакінула яе, і яна ўстала, і прыслужвала ім. ¹⁶Калі настаў вечар, прывялі да Яго многіх апанаваных злымі духамі. А Ён словам выгнаў духаў і аздаравіў усіх хворых, ¹⁷каб збылося сказанае прарокам Ісаем: «Ён узяў на сябе нашую слабасць і панёс нашыя хваробы».

Разважанне да Божага слова

Стаўленне і паводзіны сотніка выклікаюць здзіўленне. Езус бачыць, што ім кіруе вера і чулае сэрца. Пакора, з якой ён звяртаецца, выяўляе шчырасць ягоных намераў.
Езус прымае нас у слабасці, немачы і нязграбнасці. Ён носіць хваробы тых, каго палюбіў. Не адчувае агіды і не ўцякае. Сутнасць сапраўднага жыцця – быць з Езусам такімі, якія мы ёсць.
Чым ты хочаш падзяліцца з Езусам сёння – як сябар з сябрам. Можна папрасіць Яго аб ласцы даверу.

Размова

Якія пачуцці, пытанні, сумненні ці натхненні выклікала ўва мне сённяшняе Евангелле? Аддаю Езусу ўсё, што адчуваю і думаю, ведаючы, што Ён сапраўды са мной быў, ёсць і будзе.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн