Прысутнасць

Бог са мной, але больш таго,
Бог ува мне, напаўняе жыццём.
Хаця б хвіліну пабуду ў жыццядайнай прысутнасці Бога
у маім целе, розуме, сэрцы
і ва ўсім маім жыцці.

Свабода

Мне трэба суцішыцца, падняцца над шумам,
які перашкаджае, раздзяляе,
ізалюе.
Мне вельмі неабходна зноў слухаць Бога ў цішыні і спакоі.

Усведамленне

Пане, Ты даў мне начны адпачынак.
У дзённы час не дазволь мне забыцца пра Тваю дабрыню.
Накіруй мяне і пакажы, як дзяліцца Тваімі благаслаўленнямі з іншымі.

Божае слова

²³Калі ўвайшоў у човен, былі з Ім Ягоныя вучні. ²⁴І вось, пачалася вялікая бура на моры, так што човен накрывалі хвалі. А Ён спаў. ²⁵Падышоўшы, яны пабудзілі Яго, кажучы: «Пане, ратуй, мы гінем!» ²⁶А Ён сказаў ім: «Чаго вы спалохаліся, малаверныя?» Тады, устаўшы, загадаў вятрам і мору, і настала вялікая ціша. ²⁷А людзі дзівіліся і казалі: «Хто Ён такі, што і вятры, і мора слухаюцца Яго?»

Разважанне да Божага слова

Вакол чоўна, у якім плылі вучні, разгулялася бура. Вада пагрозліва залівала човен, які яшчэ нядаўна быў бяспечным і добрым сродкам перамяшчэння. Цяпер гэта поле бітвы са стыхіяй. Паводзіны Езуса здзіўляюць. Ён спіць. Ён не прадухіліў буры. Ён дазволіў вучням змагацца, адчуць страх, але не пакінуў іх. Які твой досвед прысутнасці Езуса ў барацьбе і нягодах? Якімі сваімі цяжкасцямі хочаш падзяліцца з Ім у гэтай малітве?

Размова

Паразважаю, як я сёння слухаў Божае слова. Што я хацеў бы ўзяць з сабой? Што хачу запомніць з сённяшняга чытання?

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн