Прысутнасць

У любы час дня і ночы мы можам паклікаць Езуса.
Ён заўсёды чакае нашага запрашэння.
Якое ж гэта благаслаўленне!
Не патрэбныя тэлефоны і электронныя паведамленні, толькі шэпт.

Свабода

Часцей за ўсё мне перашкаджае дасягнуць свабоды мая схільнасць
патанаць у страхах і чаканнях
аб тым, якой асобай я “маю быць”.
Мае звыклыя спосабы рэагавання звязваюць мяне
і перашкаджаюць бачыць новыя абшары ўзрастання.
Я прашу і малюся аб большым адчуванні ўнутранай свабоды і
таго, што Бог жадае здзейсніць ва мне.

Усведамленне

Дапамажы мне, Пане, лепш усведамляць Тваю прысутнасць.
Навучы мяне распазнаваць Тваю прысутнасць у іншых.
А сэрца напоўні ўдзячнасцю за выпадкі, калі Ты дзейнічаў праз іншых людзей, выяўляючы нязмерную любоў і клопат.

Божае слова

¹Увайшоўшы ў човен, Ён пераправіўся на другі бераг і прыйшоў у свой горад.

²Прынеслі да Яго паралізаванага, пакладзенага на ложы. Убачыўшы іхнюю веру, Езус сказаў паралізаванаму: «Будзь адважным, сыне, адпускаюцца твае грахі». ³Тады некаторыя кніжнікі сказалі самі сабе: «Ён блюзнерыць». ⁴А Езус, ведаючы іхнія думкі, сказаў: «Навошта задумваеце зло ў сэрцах вашых? ⁵ Бо што лягчэй? Сказаць: “Адпускаюцца твае грахі” ці сказаць: “Устань і хадзі”? ⁶Але каб вы ведалі, што Сын Чалавечы мае ўладу на зямлі адпускаць грахі». Тады сказаў паралізаванаму: «Устань, вазьмі ложа сваё і ідзі дадому». ⁷Той устаў і пайшоў дадому. ⁸А людзі, убачыўшы гэта, спалохаліся і праславілі Бога, які даў такую ўладу людзям.

Разважанне да Божага слова

Ты бачыш нашыя сэрцы, Пане, і можаш дакладна распазнаць, што матывуе нас да дзеяння. З трымценнем усведамляем, што мы для Цябе – нібы адкрытыя кнігі. Дай нам ласку шчырасці, каб заўважыць унутраныя парывы і сумленна вызначыць, адкуль яны бяруцца. Дазволь расказаць Табе пра іх і прыняць Тваю дапамогу, поўную любові.

Размова

Я пачынаю размаўляць з Езусам пра ўрывак са Святога Пісання, якім толькі што маліўся.
Што найбольш закранае мяне?
Магчыма, словы сябра, або нейкая гісторыя, якую я нядаўна пачуў, або нейкі вопыт,
павольна падымуцца на паверхню маёй свядомасці.
Калі так, то ці гэты ўспамін пралівае святло на тое, што кажа мне ўрывак са Святога Пісання?

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн