Прысутнасць

Хай радуецца і весяліцца сэрца маё
у гэты час малітвы.
Нагадвай мне часцей пра вялікія
благаслаўленні, якія Ты даеш мне, Божа мой.

Свабода

Пане, дай мне спазнаць,
што выкананне Тваёй волі прыносіць радасць,
бо Твая воля – маё найглыбейшае жаданне,
і Ты заўсёды прагнеш лепшага для мяне.

Усведамленне

Пане, Ты прысутны ва ўсім
і калі я знаходжу час, каб проста пасядзець і пабыць з Табой,
мой розум адпачывае
і я адчуваю Твой супакой.

Божае слова

⁴⁶Калі Ён прамаўляў да людзей, Маці і браты Ягоныя стаялі звонку і хацелі пагаварыць з Ім. ⁴⁷І нехта сказаў Яму: «Вось Маці Твая і браты Твае стаяць звонку і хочуць пагаварыць з Табою». ⁴⁸А Ён адказаў таму, хто звярнуўся да Яго: «Хто маці Мая і хто браты Мае?» ⁴⁹І, працягнуўшы руку сваю да вучняў сваіх, сказаў: «Вось маці Мая і браты Мае. ⁵⁰Бо хто выконвае волю Айца Майго, які ў нябёсах, той Мне брат, і сястра, і маці».

Разважанне да Божага слова

Можна пачуць прымаўку, што мудрыя людзі выбіраюць добрых бацькоў. Безумоўна, нашы блізкія здольныя вельмі значна паўплываць на тое, як мы развіваемся. З сённяшняга тэксту я разумею, што некаторыя з крэўных Езуса адчувалі, што Яго паводзіны выклікаюць напружанне і не маглі гэтага вытрымаць. Няхай жа мы зможам пачувацца з Табой па-свойску, як і Ты з намі.

Размова

О, Пане, будзь заўсёды побач.
Ствары ўва мне даверлівае сэрца.
Дзякую Табе за любоў.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн