Прысутнасць

Затрымаюся на момант,
разважаючы пра жыццядайную прысутнасць Бога
ува мне і ва ўсім вакол мяне,
і ва ўсім маім жыцці.

Свабода

Дзякуй за дар свабоды, Пане.
Дай мне магчымасць верна ісці за Табою.
Дапамажы заўсёды памятаць пра шляхі Твае,
а таксама пра Тваю любоў і апеку над усім светам.

Усведамленне

Ведаючы, што Бог любіць мяне безумоўна,
Я магу дазволіць сабе быць шчырым.
Як прайшоў мінулы дзень і што я адчуваю зараз?
Распавядаю пра свае пачуцці Пану.

Божае слова

¹⁶Калі прыйшоў у Назарэт, дзе быў выхаваны, увайшоў паводле свайго звычаю ў шабат у сінагогу і падняўся, каб чытаць. ¹⁷Яму падалі кнігу прарока Ісаі. Разгарнуўшы кнігу, Ён трапіў на месца, дзе было напісана:

¹⁸«Дух Пана на Мне, бо Ён намасціў Мяне абвяшчаць Добрую Навіну ўбогім, паслаў Мяне абвяшчаць вызваленне палонным і сляпым вяртаць зрок, каб выпусціць спакутаваных на свабоду, ¹⁹каб абвясціць год ласкі Пана».

²⁰Згарнуўшы кнігу, Ён аддаў яе слугу і сеў. А вочы ўсіх у сінагозе былі скіраваныя на Яго. ²¹І Ён пачаў гаварыць ім: «Сёння споўніліся гэтыя словы Пісання, якія вы чулі». ²²Усе сведчылі Яму і здзіўляліся словам ласкі, якія выходзілі з вуснаў Ягоных, і казалі: «Ці ж не сын Юзафа гэта?» ²³А Ён сказаў ім: «Напэўна, скажаце мне такую прыказку: “Лекар, вылечы самога сябе; зрабі і тут, у тваёй бацькаўшчыне тое, што, як мы чулі, сталася ў Кафарнауме”». ²⁴І сказаў: «Сапраўды кажу вам: ніводнага прарока не прымаюць на бацькаўшчыне яго. ²⁵Сапраўды кажу вам: шмат удоў было ў Ізраэлі ў дні Іллі, калі неба было зачынена тры гады і шэсць месяцаў, так што быў вялікі голад па ўсёй зямлі. ²⁶І да ніводнай з іх не быў пасланы Ілля, а толькі да аўдавелай жанчыны ў Сарэпце Сідонскай. ²⁷Шмат таксама было пракажоных у Ізраэлі ў часы прарока Елісея, і ніводзін з іх не быў ачышчаны, апрача сірыйца Наамана». ²⁸Пачуўшы гэта, усе ў сінагозе напоўніліся гневам ²⁹і, устаўшы, выгналі Яго прэч з горада, і павялі на край гары, на якой быў пабудаваны іх горад, каб скінуць Яго. ³⁰Але Ён, прайшоўшы паміж імі, адышоў.

Разважанне да Божага слова

Пасля аповеду пра хрост Езуса Янам і 40-дзённы перыяд у пустыні, евангеліст Лука распачынае апісанне публічнай дзейнасці Хрыста з Яго візіта ў родны горад. Ранейшае знаёмства з Езусам перашкаджае землякам адкрыць у Ім кагосьці большага, чым проста іх земляка: відавочна, Яго жыццё дагэтуль знешне мала чым адрознівалася ад іхняга. Цікава паразважаць – напрыклад, у ружанцовай малітве – над буднямі Езуса да пачатку Яго публічнай дзейнасці: як Ён жыў у сваёй штодзённасці, чым былі напоўненыя Ягоныя дні, якой была Яго малітва? Няхай схаванае жыццё Езуса ў Назарэце будзе натхненнем для пошуку Божай прысутнасці ў нашай штодзённасці.

Размова

Твае ўласныя словы, Пане, навучылі мяне маліцца.
цудоўная малітва “Ойча наш”
змяшчае ўсё, што я хацеў бы сказаць.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн