Прысутнасць

О Пане, Ты назваў мяне па імені,
запісаў на Сваіх далонях.
Дазволь мне ўзрастаць у даверы і ніколі не паддавацца адчаю.

Свабода

Пане, Ты стварыў мяне для жыцця ў свабодзе. Няхай Твой Святы Дух вядзе мяне вольна крочыць за Табой. Укарані ў маім сэрцы жаданне пазнаваць і любіць Цябе з кожным днём усё больш.

Усведамленне

Пане, Ты даў мне начны адпачынак.
У дзённы час не дазволь мне забыцца пра Тваю дабрыню.
Накіруй мяне і пакажы, як дзяліцца Тваімі благаслаўленнямі з іншымі.

Божае слова

³⁸Выйшаўшы з сінагогі, Езус увайшоў у дом Сымона. Цешчу Сымонаву ахапіла моцная гарачка. Таму прасілі Яго за яе. ³⁹Стаўшы над ёю, Ён забараніў гарачцы, і тая пакінула яе. Адразу ўстаўшы, яна прыслужвала ім.

⁴⁰На захадзе сонца ўсе, хто меў хворых на розныя хваробы, прыводзілі іх да Езуса. Ён жа, ускладаючы рукі на кожнага з іх, аздараўляў іх. ⁴¹З многіх таксама выходзілі з крыкам злыя духі і казалі: «Ты — Сын Божы». Але Ён забараняў і не дазваляў ім казаць, бо яны ведалі, што Ён Месія. ^,

⁴²Калі настаў дзень, Езус выйшаў і адправіўся ў пустыннае месца. А людзі шукалі Яго і, прыйшоўшы да Яго, затрымлівалі, каб не адыходзіў ад іх. ⁴³Але Ён сказаў ім: «Таксама іншым гарадам Мне трэба абвяшчаць Добрую Навіну пра Валадарства Божае, бо дзеля гэтага Я пасланы». ⁴⁴І прапаведаваў у сінагогах Юдэі. ^,

Разважанне да Божага слова

Захапляе той факт, як часта людзі прыводзяць да Езуса сваіх хворых сяброў і заступаюцца за іх. Яны просяць не за сябе, а за тых, хто больш бездапаможны. Пане, мы прыходзім да Цябе са сваімі хваробамі або з бедамі сяброў і просім: ускладзі на нас свае рукі Лекара.

Размова

Пане, дапамажы мне дастаткова сцішыцца, каб пачуць Твой вельмі ціхі голас. Дапамажы мне давяраць таму, што я чую. Тваё Слова прыносіць палёгку, суцяшэнне і падбадзёрванне. Усё іншае я аддаляю ад сябе.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн