Прысутнасць

Божа, Ты бліжэй, чым я магу паверыць, бліжэй, чым маё дыханне. Твая блізкасць – благаслаўленне, і мне не трэба баяцца.

Свабода

Я прашу аб ласцы
адкласці ўсе свае турботы
і быць адкрытым на ўсё, чаго Бог просіць ад мяне,
каб мяне вёў і фармаваў мой любячы Стварыцель.

Усведамленне

Прыгадваю, што знаходжуся ў прысутнасці Пана.
Знаходжу прытулак у Яго любячым сэрцы.
Ён – мая моц у хвіліны слабасці.
Ён – мой Суцяшальнік у смутку.

Божае слова

⁴³Няма добрага дрэва, якое б прыносіла дрэнны плод, ці дрэннага дрэва, якое б прыносіла добры плод. ⁴⁴Бо кожнае дрэва пазнаецца па ягоным плодзе; не збіраюць з церняў смоквы, а з куста ажын не збіраюць вінаграду. ⁴⁵Добры чалавек выносіць з добрага скарбу сэрца дабро, а дрэнны чалавек з дрэннага сэрца выносіць зло, бо пра тое, чым напоўнена сэрца, гавораць вусны ягоныя.

⁴⁶Што вы клічаце Мяне: “Пане, Пане”, а не выконваеце таго, што Я кажу? ⁴⁷Я пакажу вам, да каго падобны кожны, хто прыходзіць да Мяне, слухае Маё слова і выконвае яго. ⁴⁸Ён падобны да чалавека, які, будуючы дом, глыбока выкапаў і заклаў падмурак на скале. Калі здарылася паводка, паток хлынуў на гэты дом, аднак не змог пахіснуць яго, таму што ён быў добра збудаваны. ⁴⁹А той, хто слухае і не выконвае, падобны да чалавека, які збудаваў дом на зямлі без падмурка. Паток хлынуў на яго, і ён адразу абваліўся, і вялікае было падзенне гэтага дому».

Разважанне да Божага слова

Жыць паводле Божых запаведзяў з кожным днём нібы ўсё цяжэй, бо свет і яго эліты надзвычай часта змяняюць свае каштоўнасці. Выклік стаіць перад намі агромністы, таму не дзіўна, што мы часта журымся з-за свайго бяссілля або роспачы, у якую ўпадаюць іншыя. Памолімся аб сіле і адвазе будаваць сваё жыццё на трывалай скале сапраўдных каштоўнасцяў, а не на зыбучым пяску.

Размова

Каб камунікаваць, нам не заўсёды трэба размаўляць.
Калі ўяўляю сябе поруч з Езусам…
і проста гляджу на Яго, а Ён на мяне…
…як я сябе адчуваю?

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн