Прысутнасць

“Супакойцеся і ведайце, што Я – Бог”. (Пс 46:10)
Пане, няхай Твой Дух вядзе мяне,
шукаць Тваёй Любячай прысутнасці
больш і больш. Таму што ў ёй
я знаходжу адпачынак і аднаўляю сілы
ў гэтым напружаным свеце.

Свабода

Буду прасіць Божай дапамогі, каб
быць свабодным ад прадузятасці,
быць адкрытым на Бога падчас малітвы, і
больш пазнаваць, любіць і служыць Яму.

Усведамленне

Ведаючы, што Бог любіць мяне безумоўна,
Я магу дазволіць сабе быць шчырым.
Як прайшоў мінулы дзень і што я адчуваю зараз?
Распавядаю пра свае пачуцці Пану.

Божае слова

¹³Ніхто не ўзышоў на неба, акрамя таго, хто з неба сышоў, — Сын Чалавечы. ¹⁴Як Майсей узняў змея ў пустыні, так павінен быць узняты Сын Чалавечы, ¹⁵каб кожны, хто верыць у Яго, меў жыццё вечнае».

¹⁶Бо так палюбіў Бог свет, што аддаў Сына свайго Адзінароднага, каб кожны, хто верыць у Яго, не загінуў, але меў жыццё вечнае.

¹⁷Бо не паслаў Бог Сына свайго ў свет, каб судзіць свет, але каб свет быў збаўлены праз Яго.

Разважанне да Божага слова

У Вялікую пятніцу мы сузіраем цярпенне і смерць Езуса, бачым кошт Ягонай ахвяры. Сёння ж, у свята Узвышэння Святога Крыжа, мы ушаноўваем Ягоную бязмежную любоў да нас, выяўленую ў гэтай ахвяры, і праслаўляем за клопат пра ўсё чалавецтва. Няма большай любові, гэта найвышэйшае яе праяўленне.

Нашая ўдзячнасць найлепш увасабляецца ў імкненні жыць паводле каштоўнасцяў Езуса і цешыцца, што для кожнага з нас Ён з'яўляецца дарогай, праўдай і жыццём.

Размова

Добры Езу, я магу адкрыць Табе сэрца.
Магу сказаць Табе ўсё, што мяне турбуе.
Я ведаю, што Цябе хвалююць усе мае клопаты.
Навучы мяне жыць, не забываючыся,
што Ты ахінаеш мяне апекай сёння
і будзеш клапаціцца заўтра і ва ўсе дні жыцця майго.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн