Прысутнасць

Пане Божа, Стварыцелю мой,
будзь са мной.
мая душа прагне Тваёй прысутнасці.

Свабода

Так лёгка трапіць
у пастку багацця.
Дай, Пане, свабоду
ад прагнасці і эгаізму.
Нагадвай мне, што лепшыя рэчы ў жыцці бясплатныя:
любоў, смех, клопат і дар.

Усведамленне

О, Пане, дазволь мне свядома і ўдзячна
прыняць усе ласкі, якія Ты спасылаеш мне.
Няхай мне заўсёды хапае велікадушнасці, каб дзяліцца сваімі благаслаўленнямі з іншымі.

Божае слова

¹² У тыя дні Ён узышоў на гару памаліцца і правёў усю ноч у малітве да Бога. ¹³ Калі настаў дзень, паклікаў сваіх вучняў і выбраў з іх дванаццаць, якіх і назваў Апосталамі: ¹⁴ Сымона, якога назваў Пятром, Андрэя, брата ягонага, Якуба і Яна, Філіпа і Барталамея, ¹⁵ Мацвея і Тамаша, Якуба Алфеевага і Сымона, якога называлі Зелотам, ¹⁶ Юду Якубавага і Юду Іскарыёта, які стаў здраднікам.

¹⁷ Калі сышоў з імі ўніз і стаў на раўніне, вялікі натоўп вучняў Ягоных і вялікае мноства людзей з Юдэі і Ерузалема, з узбярэжжа Тыра і Сідона ¹⁸ прыйшлі паслухаць Яго і аздаравіцца ад сваіх хваробаў. І тыя, хто цярпеў ад нячыстых духаў, вылечваліся. ¹⁹ Усе людзі імкнуліся дакрануцца да Яго, таму што сіла сыходзіла ад Яго і вылечвала ўсіх.

.

Разважанне да Божага слова

Езус – чалавек малітвы. Перш чым выбраць апосталаў, Ён узышоў на гару памаліцца і правёў усю ноч у малітве да Бога. Ён выбраў дванаццаць апосталаў, якія прадстаўляюць дванаццаць каленаў Ізраэля і такім чынам яднаюць Новы і Стары Запаветы.

Спрабуй уявіць сябе адным з вучняў. Што ты думаеш і адчуваеш, калі Езус кліча апосталаў па імені? Як бы ты адрэагаваў, калі б Езус назваў тваё імя? Ці першым імпульсам было б адказаць: «Так!» або «Толькі не я, Пане!»? Паразмаўляй з Богам пра свае думкі і пачуцці.

Размова

Якія пачуцці, пытанні, сумненні ці натхненні выклікала ўва мне сённяшняе Евангелле? Аддаю Езусу ўсё, што адчуваю і думаю, ведаючы, што Ён сапраўды са мной быў, ёсць і будзе.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн