Прысутнасць

У любы час дня і ночы мы можам паклікаць Езуса.
Ён заўсёды чакае нашага запрашэння.
Якое ж гэта благаслаўленне!
Не патрэбныя тэлефоны і электронныя паведамленні, толькі шэпт.

Свабода

Вядзі мяне заўсёды выконваць Тваю святую волю,
ведаючы, што Твая магутнасць
дапаможа ва ўсім.

Усведамленне

Пане, адкрый маё сэрца на тое, каб пачуць і прыняць Тваё Слова. Няхай гэта прынясе вялікі плён у маім жыцці і ў жыцці іншых людзей.

Божае слова

¹Калі Езус прыйшоў у шабат да дому аднаго з кіраўнікоў фарысейскіх з’есці хлеба, яны сачылі за Ім. ²І вось, стаў перад Ім чалавек, які хварэў на вадзянку. ³Адазваўшыся, Езус спытаўся ў кніжнікаў і фарысеяў: «Ці дазволена вылечыць у шабат ці не?» ⁴Яны ж маўчалі. І, дакрануўшыся, аздаравіў таго і адпусціў. ⁵А ім сказаў: «Калі ў каго-небудзь з вас сын або вол упадзе ў студню, ці ж не выцягне адразу яго ў дзень шабату?» ⁶І яны не змаглі запярэчыць Яму на гэта.

Разважанне да Божага слова

Напэўна, Езусу было цяжка, калі фарысеі ўвесь час сачылі за Ім і выпрабоўвалі Яго. Яны ўмацоўвалі сваю ўладу над народам праз тое, што патрабавалі выканання доўгага пераліку рэлігійных правілаў і прадпісанняў.

Езус паставіў пад сумнеў распаўсюджанае перакананне, нібыта Богу можна падабацца толькі праз захаванне закону. Калі Ён аздаравіў чалавека, хворага на вадзянку, кіраўнікі не змаглі нічога адказаць, бо Ягоныя ўчынкі паказалі людзям: любоў, спагада і клопат пра тых, каму патрэбная дапамога, важнейшыя за любы закон. Памолімся аб дары любові і спачування да сябе і да іншых.

Размова

Езус часта задаваў пытанні тым, хто прыходзіў да Яго.
Адчуваючы Яго цяпер побач,
уяўлю, што Ён пытаецца ў адказ на маю малітву:
“Чаго ты жадаеш?”
“Як табе дапамагчы?”
“Што Я магу табе даць?”

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн