Прысутнасць

“Стаю каля дзвярэй і стукаю”, – кажа Пан. (Ап 3:20). Які цудоўны прывілей: Пан усяго стварэння жадае прыйсці да мяне. Шырока адчыняю дзверы, каб прывітаць Яго.

Свабода

Пане, я малюся аб Тваім дары свабоды.
Няхай Святы Дух
натхняе людзей ва ўладзе працаваць на карысць
сапраўднай справядлівасці для ўсяго Божага народу.

Усведамленне

Ведаючы, што Бог любіць мяне безумоўна,
Я магу дазволіць сабе быць шчырым.
Як прайшоў мінулы дзень і што я адчуваю зараз?
Распавядаю пра свае пачуцці Пану.

Божае слова

¹Калі Езус прыйшоў у шабат да дому аднаго з кіраўнікоў фарысейскіх з’есці хлеба, яны сачылі за Ім.

⁷Заўважыўшы, што запрошаныя выбіралі першыя месцы, расказаў ім прыпавесць: ⁸«Калі нехта пакліча цябе на вяселле, не сядай на першае месца, каб не аказалася, што нехта з пакліканых ім больш ганаровы за цябе, ⁹і каб той, хто запрасіў і яго, і цябе, не падышоў і не сказаў табе: “Саступі яму месца”. Тады з сорамам павінен будзеш заняць апошняе месца. ¹⁰Але калі запросяць цябе, прыйдзі і сядай на апошняе месца, каб той, хто цябе запрасіў, падышоў да цябе і сказаў: “Дружа, перасядзь вышэй”. Тады будзе табе пашана перад тымі, хто сядзіць з табою. ¹¹Бо кожны, хто ўзвышае сябе, будзе паніжаны, а хто паніжае сябе, узвысіцца».

Разважанне да Божага слова

Пасланне вельмі яснае: усе, хто ўзвышае сябе, будуць прыніжаныя, а тыя, хто прыніжае сябе, будуць узвышаныя. Езус пастаянна паказваў крывадушнасць паводзінаў старэйшын і фарысеяў, якія шукалі прызнання і былі задаволеныя сабой.

Кожны можа зразумець сорам чалавека, які сядзеў на ганаровым месцы і мусіў знесці прыніжэнне, калі яго папрасілі перайсці на іншае месца. Варта маліцца аб сапраўднай пакоры, аб рэалістычным разуменні ўласных моцных і слабых бакоў.

Размова

Якое слова ці выраз з сённяшняга Евангелля прыцягнулі маю ўвагу? Прашу Пана адкрыць мне, што Ён хоча сказаць мне гэтым словам…

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн