Прысутнасць

Заўсёды прыемна быць у прысутнасці сяброў. Ты, Пане, мой самы блізкі і сапраўдны сябар. Няхай жа я ніколі не забудуся, якога сябра я маю ў Табе.

Свабода

Дзякуй за дар свабоды, Пане.
Дай мне магчымасць верна ісці за Табою.
Дапамажы заўсёды памятаць пра шляхі Твае,
а таксама пра Тваю любоў і апеку над усім светам.

Усведамленне

Як я сябе адчуваю? У добрым настроі? Або прыгнечаным?
Магчыма, мне цяпер добра быць тут.
Аднак, можа быць і так, што ўваходжу ў гэты час малітвы расчараваным, заклапочаным або нават раззлаваным.
Прызнаю перад Панам, што са мной дзеецца на самой справе. Вось такога, сапраўднага, мяне любіць Пан.

Божае слова

¹Убачыўшы натоўп, Езус узышоў на гару. А калі сеў, падышлі да Яго вучні Ягоныя. ²І, адкрыўшы вусны свае, Ён вучыў іх, кажучы:

³«Шчаслівыя ўбогія духам, бо іх ёсць Валадарства Нябеснае.

⁴Шчаслівыя засмучаныя, бо яны будуць суцешаны.

⁵Шчаслівыя лагодныя, бо яны атрымаюць у спадчыну зямлю.

⁶Шчаслівыя галодныя і прагнучыя справядлівасці, бо яны будуць насычаны.

⁷Шчаслівыя міласэрныя, бо яны спазнаюць міласэрнасць.

⁸Шчаслівыя чыстыя сэрцам, бо яны Бога ўбачаць.

⁹Шчаслівыя міратворцы, бо яны будуць названыя сынамі Божымі.

¹⁰Шчаслівыя, каго пераследуюць за справядлівасць, бо іх ёсць Валадарства Нябеснае.

¹¹Шчаслівыя вы, калі будуць вас зневажаць, пераследаваць і ўсяляк зласловіць несправядліва за Мяне. ¹²Радуйцеся і весяліцеся, бо вялікая ўзнагарода вашая ў нябёсах. Бо так пераследавалі прарокаў, якія былі перад вамі.

Разважанне да Божага слова

Езус сваёй прамовай сапраўды перавярнуў звыклыя ўяўленні вучняў. Нядаўна гэты ўрывак чыталі на нядзельнай літургіі, і за некалькі дзён да яе група парафіянаў сабралася, каб разам паразважаць над яго сэнсам. Асабліва мяне ўразілі словы аднаго з удзельнікаў нашай размовы. Ён сказаў: «Калі б я асабіста слухаў гэтую прамову, то адразу ўстаў бы і паехаў дадому першым жа аўтобусам». Магчыма, і я апынуўся б у гэтым жа аўтобусе… А чым падзяліўся б ты, калі б удзельнічаў у нашай сустрэчы?

Размова

“Няма цяпер ніякага асуджэння тым, хто ў Хрысце Езусе” (Рым 8:1). Я звяртаюся да Таго, Хто любіць мяне і ведае мяне лепш, чым я магу любіць ці ведаць сябе. Прашу Яго аб тым, што мне цяпер патрэбна.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн