Láthair Dé

Stopaim ar feadh nóiméad agus smaoiním ar an ngrá
agus an grásta a thaispeánann Dia dom:
Cruthaíodh in íomhá agus ar chosúlacht Dé mé;
Is mise áit chónaithe Dé.

Saoirse

A Thiarna, bhronn tú bronntanas mór na saoirse dom.
Ar na saolta seo, a Thiarna, deonaigh go mbeidh mé saor
ó aon chineál ciníochais nó éadulaingt.
Cuir i gcuimhne dom, a Thiarna, go bhfuilimid go léir comhionann
i do shúile grámhara.

Comhfhios

A Thiarna, deonaigh gur mhian liom i gcónaí
am a chaitheamh i do láthair.
Ná déana mé dearmad ar do mhaitheas dom.
Treoraigh mé do chuid beannachtaí a roinnt le daoine eile.

Briathar Dé

³⁹Chuir Muire chun bóthair sna laethanta sin agus d’imigh go deifreach faoi dhéin na gcnoc go dtí cathair in Iúdá, ⁴⁰agus chuaigh isteach i dteach Zachairias agus bheannaigh d’Eiliosaibeit. ⁴¹Agus tharla, nuair a chuala Eiliosaibeit beannachadh Mhuire, gur bhíog an naíonán ina broinn, agus líonadh Eiliosalbeit den Spiorad Naomh, ⁴²agus d’éigh sí de ghlór ard agus dúirt: “Is beannaithe tú idir mná, agus is beannaithe toradh do bhroinne. ⁴³Agus conas a tharla seo domsa, máthair mo Thiarna a theacht chugam? ⁴⁴Óir féach, nuair a chuaigh glór do bheannachtha i mo chluasa, bhíog an naíonán i mo bhroinn le háthas. ⁴⁵Agus is méanar di seo a chreid go gcomhlíonfaí na nithe a dúradh léi ón Tiarna.”

⁴⁶Agus dúirt Muire,

“Mórann m’anam an Tiarna,

⁴⁷agus rinne mo spiorad gairdeas i nDia mo Shlánaitheoir. ⁴⁸Óir dhearc sé le fabhar ar ísle a bhanóglaigh; mar féach, déarfaidh na glúine uile feasta gur méanar dom. ⁴⁹Óir rinne an Té atá cumhachtach nithe móra dom agus is naofa a ainm, ⁵⁰agus tá a thrócaire ó ghlúin go glúin dóibh seo ar a mbíonn a eagla. ⁵¹Thaispeáin sé neart a láimhe: scaip sé an dream a bhí uaibhreach i smaointe a gcroí. ⁵²Leag sé prionsaí óna gcathaoireacha, agus d’ardaigh sé daoine ísle; ⁵³Líon sé lucht an ocrais le nithe maithe, agus chuir sé na saibhre uaidh folamh. ⁵⁴D’fhóir sé ar Iosrael a sheirbhíseach, ag cuimhneamh dó ar a thrócaire – ⁵⁵de réir mar gheall sé dar n‑aithreacha – d’Abrahám agus dá shliocht go brách.”

⁵⁶D’fhan Muire aici timpeall trí mhí, agus d’fhill abhaile.

Inspioráid

Téann Muire, ina cineáltas, chun cabhrú lena col ceathrar Eilís atá ag iompar clainne. Molann Eilís, spreagtha ag an Spiorad Naomh, Muire as creidiúint i bhfocail na teachtaireachta a thug Dia chuici ón aingeal Gabriel. Is í Muire ár n-eiseamláir mhór creidimh agus í ag glacadh leis an méid a tharlóidh di, fiú a Mac a fheiceáil á chur chun báis ar an gcros.

Is samhail bhuíochais do Dhia í Muire freisin agus í ag aithint go dtagann gach rud ó lámha Dé. ‘Óir rinne an té atá cumhachtach rudaí móra domsa.’ Guíonn sí le spiorad mór umhlaíochta, ag aithint a laghad féin. ‘A Mhuire, ár Máthair, cuidigh linn foghlaim uait agus do Mhac Íosa Críost a leanúint i gcreideamh agus in umhlaíocht.’

Comhrá

Ag cuimhneamh go bhfuilim fós i láthair Dé,
samhlaím Íosa Féin ina sheasamh nó ina shuí in aice liom,
agus deirim cibé rud atá ar m’intinn, cibé rud atá i mo chroí,
ag labhairt mar chara amháin le cara eile.

Conclúid

I thank God for His gift of love
as I go forth with joy and hope
to serve His people.

Áiméan